"Prezident İlham Əliyev yerli kanallara müsahibəsində bir çox vacib məsələlərə toxundu"-Ceyhun Məmmədov

"Prezident İlham Əliyev yerli kanallara müsahibəsində bir çox vacib məsələlərə toxundu. Möhtərəm Prezidentimizin toxunduğu məsələlərdən biri də məmurların fəaliyyəti ilə bağlı idi. Cənab Prezident bir daha bütün məmurlara ciddi xəbərdarlıq etdi, neqativ hallara yol verməməyi xüsusi tapşırdı, onların fəaliyyətinə həm ictimai, həm də media nəzarətinin olmasının əhəmiyyətini xüsusi vurğuladı".

Sonxeber.az-ın məlumatına görə bunu Elm və təhsil komitəsinin üzvü, deputat Ceyhun Məmmədov deyib.

Onun sözlərinə görə, bu baxımdan Prezident Administrasiyası ilə yanaşı, ictimaiyyətin və medianın da dövlət qurumlarının və məmurların fəaliyyətinə nəzarəti xüsusi əhəmiyyət daşıyır:

"Cənab Prezident qeyd etdi ki, o, bir sıra məlumatları mediadan alaraq müəyyən tapşırıq və göstərişlər verir. Bu, həm də Prezidentin cəmiyyətdə gedən prosesləri xüsusi diqqətdə saxladığının, onlara həssas münasibətinin göstəricisidir.

Media zaman-zaman cəmiyyətdə, dövlət qurumlarının fəaliyyətində müşahidə olunan neqativ hadisələri obyektiv işıqlandırmalı, öz reaksiyasını verməlidir. Bu, təkcə bir qurumun deyil, həm də cəmiyyətin üzərinə düşən mühüm vəzifədir. Cəmiyyət özü də bu kimi məsələlərdə çox həssas olmalı və yeri gəldikcə öz reaksiyasını verməlidir. Bununla cəmiyyətdə gedən proseslərə dövlət qurumları ilə yanaşı, həm ictimaiyyətin, həm də medianın nəzarətini təmin emiş olarıq".

ZAİRA AKİFQIZI

Telegramda izləyin