"O, müəllimdir?!" - Təhsil ekspertindən SƏRT AÇIQLAMA
Bir neçə gün öncə Bakıda 165 saylı məktəbin videosu sosial şəbəkələrdə yayılaraq qızğın müzakirələrə səbəb olub. Həmin görüntülərlə bağlı fikirlər birmənalı deyil. Şagirdlərin "özbaşınalığı" məktəb-valideyn-şagird münasibətlərinin zəifliyindən irəli gəlir.
Məsələ ilə bağlı Sonxeber.az-a münasibət bildirən təhsil eksperti Kamran Əsədov şagirdlərin təlim-tərbiyəsində müəllimin daha böyük məsuliyyət daşıdığını deyir:
"Hər bir valideynin təhsil prosesində, uşağın tərbiyəsində rolu var. Bəs valideyni olmayan uşaqlar nə etməlidirlər? Ona görə də məktəblə bağlı danışdıqda, heç bir halda yükü valideynin üzərinə atmamalıyıq. Məktəb öz öhdəliyini yerinə yetirməyə borcludur.
Bəli, valideyn məktəbdə təlim-tərbiyə prosesində tərəfdaş olmalıdır. Bu, şagirdin məsuliyyətini daha da artıracaq. Bugünkü reallıq odur ki, valideyn kənara çəkilib və tədris prosesində iştirak etmir.
Biz dəfələrlə demişik ki, valideyn öz potensial imkanlarından istifadə etməlidir, çünki uşağı ən yaxşı tanıyan odur. Amma valideyn var ki, səhərdən axşama işləyir və tədris prosesində iştirak edə bilmir.
Həqiqətən də, valideyn-məktəb əlaqələri düzəlsə, valideynlərin məktəb prosesində iştirakı aktiv olsa, yaxşı olar. Amma hazırda məktəblər informasiya cəhətdən valideynlərə bağlıdır. Təhsil adamları, nazirlik qeyd edir ki, valideyn tədris prosesində iştirak etməlidir. Halbuki, valideyn sinifdə dərs prosesində iştirak etmək istəsə də, onu məktəbə buraxmırlar. Bunun üçün gərək icazə olsun.
Əgər uşaqda problem varsa, bu, məktəbin problemidir. Məktəb yalnız tədris etmir, təlim-tərbiyəni də verir. Məktəb vətəndaş, şəxsiyyət yetişdirir.
Pul yığanda valideyn yada düşür, amma monitorinq etmək istəyəndə valideyni məktəbə buraxmırlar. Məktəblərdə problemlərin həll olunmasını istəyiriksə, sanitar qovşaqlardan başqa, hər yerdə kameralar quraşdırılmalıdır. Bu zaman ictimai nəzarət olacaq.
Məktəb öz öhdəçiliyini yerinə yetirməlidir. Dövlət məktəblərdə psixoloqa, təlim-tərbiyə üzrə direktor müavininə ştat ayırıb ki, onlar öz işlərini görsünlər. Valideyni günahlandırmaq lazım deyil.
Hazırda Azərbaycanda valideyn himayəsindən məhrum 40 mindən çox uşaq var. Bəs onlar nə etsinlər?
İndi az qalırlar ki, uşaq dünyaya gələn kimi onu müəllim yanına hazırlığa qoysunlar. Dövlətin pulsuz verdiyi təhsili müəllim uşağa vermir, ona görə də valideyn pul verib eyni şeyi kənardan alır.
Bu gün sosial şəbəkələrdə müəllimlərin nə qədər videoları yayılıb. O, müəllimdir?!
Çətin tərbiyə olunan uşaqlarla isə işləmək lazımdır. Bəhanə olunur ki, əmək haqqı azdır. Əmək haqqının az olmasının günahkarı və səbəbkarı şagird deyil. Müəllim bu vəzifəyə gələndə bilirdi ki, onun maaşı, vəzifəsi, öhdəliyi nədir.
Günahkar axtarmaq lazım deyil, hərə öz öhdəliyinə düşəni etməlidir. Evdə ana öz uşağına deyə bilər ki, "atan mənə az pul verir, mən sənə baxmıram"?! Siz müəllimsiniz, sizə valideynlər övladlarını etibar ediblər. Uşaqlar valideyndən çox müəllimlə ünsiyyətdə olurlar.
Bu uşaqlar yuxarı sinif şagirdləridir. Niyə belə olur? Çünki 25 şagird olan sinifdə 5 nəfər oxumursa, müəllim onları arxa sırada oturdur. Onlar da sonradan özlərini göstərmək üçün belə edirlər.
Məktəbdə sinif nümayəndəsi ən zəif oxuyan, dəcəl uşaq qoyulmalıdır, digər oxumayan uşaqlara təşkilati işlər verilməlidir, müəyyən tapşırıqlar verilməlidir ki, onlar prosesdə iştirak edib məsuliyyət daşısınlar.
Bu, çox ciddi məsələdir. Müəllim dərs prosesində şagirdlə işləməlidir. Yalnız o zaman bu cür hallar aradan qaldırıla bilər."
Aygün Osmanlı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş