Distant təhsilə keçid etməyə ehtiyac varmı? - AÇIQLAMA

Ölkəmizdə yoluxma sayı kəskin artmaqda davam edir. Artıq uşaqlar arasında da xəstəlik yayılıb. Bəzi məktəblər yoluxma səbəbindən distant təhsilə keçid edir. Bəs uşaqlar arasında yayılan xəstəliyi nəzərə alsaq, Azərbaycanda distant təhsilə keçid etməyə ehtiyac varmı?

Məsələ ilə bağlı Sonxeber.az-a Elm və təhsil komitəsinin üzvü, deputat Ceyhun Məmmədov açıqlama verib.

O, sağlamlığımızı və ənənəvi təhsilimizi qorumalı olduğumuzu vurğulayıb:

"Hazırkı dönəmdə məktəblərin qapadılması fikri ilə razı deyiləm. Düzdür, yoluxma sayı çoxdur və bunun müxtəlif səbəbləri var. Amma distant təhsilə keçid sadə məsələ deyil, kifayət qədər mürəkkəbdir.

Belə addım atsaq, məktəblərlə yanaşı universitetləri də qapatmalıyıq. Düşünürəm, indiki mərhələdə hələ gözləmək lazımdır. Gələcəkdə ehtiyac olsa, məsələyə baxıla bilər.

Məsələ buraındadır ki, biz distant təhsilə keçən kimi təhsilin keyfiyyəti də avtomatik olaraq düşəcək. Bu proses kifayət qədər ciddidir.
Bəzilərinin şəraiti distant təhsilə imkan vermir: evdə internetləri və ya texniki avadanlıqları (telefon və kompüterləri) yoxdur. Ona görə də təhsilin keyfiyyətini qorumaq istəyiriksə, ənənəvi təhsili saxlamağa, diatant təhsilə keçməməyə çalışmalıyıq.

Buradakı problemlərin kökündə, təəssüf ki, insanlardakı arxayınçılıq durur. Buster dozanı hər kəs vurdurmayıb və hələ də tərəddüd edənlər var. Lakin hamı gigiyenik qaydalara əməl etməlidir, 3-cü doza vaksini vurdurmalıdır. Biz özümüzü qorumaqla təhsili də qorumuş oluruq.

Hesab edirəm ki, hələ distanta keçməməliyik. Ötən dövrdəki distant təhsilinin bizə yaratdığı çətinliklərdən hələ tam xilas olmamışıq".

ZAİRA AKİFQIZI

Telegramda izləyin