"Silikon": Dəb, yoxsa dərd? - Kosmetoloqdan MƏSLƏHƏTLƏR

"Gözəllik ondur, doqquzu dondur" deyib atalarımız. İllər əvvəl bu deyim geyimə, saç düzümünə, makiyaja aid edilirdisə, indi üzdə və bədənin müxtəlif hissələrində edilən dəyişikliklər kimi qəbul olunur. Qadınlarımızın çoxu gözəlləşmək üçün əldən-ayaqdan gedirlər. Bəli, bu normaldır və lazımdır. Amma elə qadınlarımız var ki, özünə baxmaq, qulluq etmək istəyərkən, özlərini elə bir hala salırlar ki, adamın gülməyi gəlir. Onlar bu görünüşləri ilə məşhur aktrisalara bənzəməyə, onların görkəmini əldə etməyə çalışırlar, nəticə isə rüsvayçılıq olur. Küçəyə çıxmaq belə, çətinləşir, çünki gözəgirən "silikon" hamının diqqətini cəlb edir. Cəmiyyət tərəfindən bu cür xanımlara "bunun yiyəsi yoxdur", "özünü nə günə qoyub", "elə bilir, qəşəngdi" kimi ehyamlı mesajlar verilsə də, günü-gündən belə "gözəllərin" sayı çoxalır.

Həkim-kosmetoloq Elnarə Rzayeva Sonxeber.az-a açıqlamasında xanımlara məsləhətlər verməklə yanaşı, "silikon və botoks"dan düzgün istifadə qaydasından və onun fəsadlarından da danışıb.

O, hesab edir ki, insanın yaşı deyil, necə görsəndiyi əsasdır:

""Silikon" kimi nəzərdə tutduğumuz təbii gel gialuron turşusudur. Təbii gellərdən düzgün və qədərində istifadə etdikdə fəsad törətmir. Təbii geldən istifadə bir növ süngəri suda islatmağa bənzəyir. Həddindən çox istifadə olunduqda insanların üzləri şişmiş olur, xüsusən də səhər oyananda. Gellər sayəsində dəri öz elastikliyini itirir və ilbəil daha çox geldən istifadə etmək lazım olur ki, dəri sallanmasın.

Süni geldən ümumiyyətlə istifadə etmək olmaz. Süni gedən istifadə hər hansı virusdan daha təhlükəlidir. Çünki bu, insanın məhvinə səbəb olur.

50-60 faiz pasiyentə ümumiyyətlə gel vurdurmaq olmaz. Geldən istifadə etməzdən əvvəl müəyyən prosedurlar olmalıdır. Əgər nəticə etibarı ilə həmin insana gel vurmaq zərərli olarsa, həkim "acgözlük" etməyib, bu pasiyenti həmin prosedurdan imtina etdirməlidir.

Botoks alında, qaşlar arasında, ümumiyyətlə üzdə olan mimik qırışlara görə edilir. Əgər botoksdan sonra üzdə mimika itirsə, dartılmış, tərpənməyən sifət olursa, o zaman bu, səhv görülmüş işin göstəricisidir. Ümumiyyətlə, bu prosedurdan sonra insanın üzündə botoks olunduğu hiss olunmamalıdır. Yəni həmin şəxsin mimikası hiss olunmalıdır, qaşı tərpənməlidir, ağlayanda ağlamağı, güləndə gülməyi bilinməlidir.

Təəssüflər olsun ki, hazırda gənc qızları da bu cür prosedurlara asanlıqla cəlb edirlər. Buna razılaşan xanımların psixoloji vəziyyəti yerində deyil, özgüvən problemi olur. Botoksla onların üzündəki məsumiyyəti də yox olur.

Belə əməliyyatlara razılaşan insanlar cəmiyyət üçün də təhlükəlidirlər. Özünə bu qədər "işgəncə" edən insan başqasına nələr etməz?!

İstər dolğu, istər botoks qədərində olmalıdır. Elə etdirmək lazımdır ki, bu, hiss olunmasın. Həddindən artıq dolğu etdirən xanımlar heç də qarşı cinsin nümayəndələri tərəfindən müsbət qarşılanmır. Bu cür xanımları qəbul edən kişilərin çoxu ya elə ailədə o cür xanımların içində böyüyüb, ya da "alfonsdurlar".

Təəssüflər ki, hazırda bəzi "həkim-kosmetoloqlarımız" elə bir haldadırlar ki, pasiyenti düzgün yönləndirə bilmirlər. Odur ki, prosedurları etdirmək üçün düzgün şəxsə müraciət olunmalıdır.

Üzdəki hər hansı bir nahiyə, bədənin müxtəlif hissələri geyim deyil ki, hər il müxtəlif dəbə uyğunlaşsın. İnsan parça deyil ki, hər dəfə kəsib-doğrayıb yeni bir formaya salınsın. Təbiilik, insanın təbii vəziyyəti hər zaman dəbdədir".

Aygün Osmanlı

Telegramda izləyin