Ağ Evdən İrana hücumla bağlı açıqlama: ABŞ seçkilərə qədər zərbə endirməyəcək

Ağ Ev ABŞ-ın noyabr ayında keçiriləcək aralıq seçkilərindən əvvəl İrana hücum etməyəcəyini açıqlayıb. Bəyanat regionda mümkün yeni hərbi əməliyyatlarla bağlı müzakirələrin intensivləşdiyi bir vaxtda verilib.

Sonxeber.az Associated Press-ə istinadən xəbər verir ki, Ağ Evin sözçüsünün müavini Anna Kelli İsrailin Baş naziri Benyamin Netanyahunun İran rəhbərliyinə qarşı mümkün addımlarla bağlı açıqlamalarına dair sualları cavablandırarkən ABŞ-ın mövqeyini açıqlayıb.

Kelli bildirib ki, İran həm iqtisadi, həm də hərbi baxımdan çətin vəziyyətdədir. O, həmçinin ABŞ-ın İrana qarşı tətbiq etdiyi dəniz blokadasının tam qüvvədə qalacağını vurğulayıb.

Ağ Ev rəsmisi ABŞ-ın noyabrda keçiriləcək aralıq seçkilərdən əvvəl İrana hücum etməyəcəyini bildirib. Bununla belə, açıqlamada İsrailin İrana qarşı mümkün hərbi əməliyyatı ilə bağlı konkret mövqe ifadə olunmayıb.

ABŞ-da Konqresə aralıq seçkilər noyabrın 3-də keçiriləcək. Ağ Evin açıqlaması Vaşinqtonun seçkilərə qədər İrana birbaşa hərbi zərbə endirməmək mövqeyini ortaya qoysa da, bu, seçkilərdən sonra mümkün addımlarla bağlı təminat vermir.

Müəllif: İlkin Məmmədkərimov

Telegramda izləyin