Məhsulun üzərindəki tarix dəyişdirilib? Bunu necə müəyyən etmək olar? - QİDA EKSPERTİNDƏN AÇIQLAMA

Məhsulların üzərindəki istehsal tarixinin və son istifadə müddətinin dəyişdirilməsi istehlakçıların aldadılması ilə yanaşı, qida təhlükəsizliyi baxımından da ciddi narahatlıq doğurur. Xüsusilə, qablaşdırmanın üzərindəki tarix məlumatlarının saxtalaşdırılması alıcıların vaxtı keçmiş məhsulları bilmədən almasına səbəb ola bilər.

Bəs məhsulun istehsal tarixi və son istifadə müddətinin sonradan dəyişdirildiyini hansı əlamətlərdən müəyyən etmək mümkündür? İstehlakçılar alış zamanı nələrə diqqət etməlidirlər?
Mövzu ilə bağlı qida eksperti Fərid Səfərov Sonxeber.az-a açıqlamasında bildirdi ki, məhsulun üzərindəki istehsal tarixinin və son istifadə müddətinin dəyişdirilməsini müəyyən etmək üçün istehlakçılar ilk növbədə qablaşdırmanın vəziyyətinə və tarix məlumatlarının necə qeyd olunduğuna diqqət yetirməlidirlər. Tarixlərin üzərində əlavə etiketin olması, əvvəlki məlumatların silinməsi, yazıların fərqli şrift və rəngdə görünməsi, çapın bulanıq və ya qeyri-bərabər olması şübhə yarada bilər. Həmçinin qablaşdırmada cırılma, yapışdırılma izləri və ya tarixin olduğu hissədə müdaxilə əlamətləri varsa, məhsula ehtiyatla yanaşmaq lazımdır.

Bununla belə, yalnız bu əlamətlərə əsasən tarixin saxtalaşdırıldığını qəti şəkildə demək olmaz. Bəzi istehsalçılar tarix məlumatlarını ayrıca etiketdə qeyd edə və ya çap texnologiyasına görə fərqli görünüşdən istifadə edə bilərlər. Buna görə məhsulun etiketindəki məlumatları, istehsalçı və idxalçı barədə qeydləri, partiya nömrəsini və qablaşdırmanın bütövlüyünü birlikdə qiymətləndirmək vacibdir.

İstehlakçılar məhsulun son istifadə müddətinin bitmədiyini yoxlamalı, lakin yalnız tarixə güvənməməlidirlər. Qablaşdırma şişibsə, zədələnibsə, məhsulun rəngi, qoxusu və ya konsistensiyası dəyişibsə, onu almaq və ya istifadə etmək olmaz. Eyni zamanda, normal görünüş və qoxu da məhsulun təhlükəsiz olduğuna zəmanət vermir.

Tarixlərin dəyişdirilməsinə dair əsaslı şübhə yarandıqda, məhsulu almamaq, artıq alınıbsa istifadə etməmək, qəbzi və qablaşdırmanı saxlamaq, məsələ ilə bağlı Azərbaycan Qida Təhlükəsizliyi Agentliyinə (AQTA) müraciət etmək məqsədəuyğundur. Belə halların dəqiq müəyyənləşdirilməsi isə müvafiq yoxlama və ekspertiza vasitəsilə mümkündür.

Sağlam qidalanaraq sağlam yaşayın!

Müəllif: İlkin Məmmədkərimov

Telegramda izləyin