"İşçilərlə küçədə aldığı bir tərbiyəyə uyğun davranır" - Deputat məmur özbaşınalığından GİLEYLƏNDİ

Bəzi məmurlar xalqa xidmət etməyi tam əksinə başa düşürlər. Vətəndaşların yaxşı yaşaması üçün məmur-vətəndaş münasibətlərini düzgün qurmaq əvəzinə, vətəndaşdan tamamilə uzaqlaşır, özlərini sanki "dağ başına qoyurlar".

Deputat Fazil Mustafa mövzuyla bağlı Sonxeber.az-a açıqlamasında bildirib ki, bəzi məmurlar vəzifədə oturub, qanunu, hüququ, insanla davranışı bilmirlər:

"Hansısa bir rayonda, bölgədə işçilərlə küçədə aldığı bir tərbiyəyə uyğun davranır. Məhkəmə mexanizmi bizdə insanları, vətəndaşı tam qoruya bilmədiyi üçün heç kim də öz hüququnu axıra qədər müdafiə etməyə ümidlə yanaşmır. Belə bir vəziyyətdə haqqı pozulan kifayət qədər insanlar var. Özbaşınalıq, başqalarına olan münasibətdə tətbiq olunan qeyri-etik davranışlardır Azərbaycanda xeyli yayğındır. Təbii ki, sağlam düşüncəli məmurlar da var. Onlar da, hesab edirəm ki, o qədər də yüksək vəzifələr tuta bimirlər. Çünki məhz bu özbaşınalıq "keyfiyyəti" çox zaman "yuxarı qalxmaq" üçün əsas meyarlardan biri olur.

"Məmur əlçatanığı" da spesifik, "bizə məxsus" bir məsələdir. Vətəndaş bir tərəfə, bir millət vəkili olaraq müraciət etdikdə, elə nazir var ki, "əlçatan" deyil, zəng etdikdə vecinə olmur. Çünki elə bilir ki, ona heç kim heç bir söz deyən deyil, "arxası möhkəmdir". Çox zaman köməkçisi götürür, nömrə verirsən, amma geri yığmır. Ona görə ki, məsuliyyət yoxdur, arxayındır ki, sənin haradasa dediyin sözün ona təsiri yoxdur. Bu məsələdə bəzi hallarda "cəzasızlıq mexanizmi" mövcud olduğuna görə, kiminsə haqqında neqativ bir məlumat səsləndirəndə də buna ciddi əhəmiyyət verilmir".

Aygün Osmanlı

Telegramda izləyin