Dələduzlardan necə qorunaq? - Bankdan AÇIQLAMA

Son dövrlər bankların adından istifadə edərək dələduzluq etməyə çalışan şəxslərin sayı çoxalıb. Bəs bununla bağlı mübarizəni banklar necə aparır? Hansı tədbirlər görülür?

Mövzuyla bağlı "Kapital Bank"ın İctimaiyyətlə əlaqələr şöbəsinin rəisi Pərviz Sədrəddinov Sonxeber.az-a açıqlama verib.

O bildirib ki, "Kapital Bank" dələduzlarla bağlı mübarizəyə uzun zamandır başlayıb:

"Bizim müştəri seqmentinin bir hissəsi həssas əhali kateqoriyasına aiddir. Təqaüdçülər, əlillik müavinətləri alanlar, xüsusən yaşlı insanlar çox zaman texnologiyadan, kartdan istifadədən bir az kənar olurlar. Bu da onların yaşları ilə əlaqədardır. Biz bununla bağlı 2017-ci ildə "yaşlı insanların maarifləndirilməsi" ilə bağlı sosial layihə hazırladıq. Daha sonra yaşlı insanlara treninqlər keçirdik, kartdan ən sadə istifadə qaydalarını öyrətdik. Bu gün də biz təlimlərimizi davam etdiririk. Artıq həmin insanlara bankomat yox, POS-terminallardan, nağdsız ödənişlərdən istifadəni təbliğ edirik. Əvvəllər pensiya verilən vaxt bankomatların qarşısında uzun növbələr olardı. İndi isə o növbələr azalıb, çünki biz onlara post-terminaldan istifadəni təşviq edirik: pulu kartdan çıxarmaq əvəzinə, ödənişləri post-terminal vasitəsilə etsinlər.

Bu barədə dövlətin də böyük dəstəyi oldu ki, bu strategiyanı, nağdsız ödənişlərin təşviqini həyata keçirdi. Bizim mobil tətbiqimiz var. Ölkə üzrə digər tətbiqlər arasında birinci yerdədir.

Dələduzluqla bağlı əhalini diqqətli olmağa çağırırıq. Heç bir bank işçisi zəng edib kart sahibindən kart məlumatlarını, təhlükəsizlik kodlarını istəyə bilməz. Əgər sizə zəng edən həqiqətən bank əməkdaşıdırsa, o sizin nömrənizi, müştəri kodunuzu gördüyü kimi, sistemdə digər məlumatları da görə bilir. Bu səbəbdən həmin insanlara aldanmayın. Kartın 16 rəqəmli kodunu, istifadə müddətini, kartın arxasında olan CVC kodunu, telefona gələn "3D-Secure" kodunu heç kimə deməyin. Təbii ki, ən əsası isə kartı heç kimə vermədən özünüzdə saxlayın. İnsanlar pul kisələrinə necə münasibət göstərirlərsə, eyni münasibəti də kartlarına göstərməlidirlər".

Aysel SƏFƏRZADƏ

Telegramda izləyin