İcbari Tibbi Sığorta ilə bu xidmətlər PULSUZDUR - RƏSMİ

Bir çoxları İcbari Tibbi Sığortanın (İTS) nə olduğu barədə məlumatsızdırlar. İTS nədir? Bu sığorta ilə hansı xidmətlərdən faydalana bilərsiniz?

Sonxeber.az oxucuları məlumatlandırmaq üçün İcbari Tibbi Sığorta üzrə Dövlət Agentliyinə mövzu ilə bağlı sorğu göndərib.

Sorğunun cavabına əsasən hazırladığımız yazını təqdim edirik:

İcbari Tibbi Sığorta nədir?

İTS əhalinin sosial müdafiəsi formasıdır və sığorta hadisəsi zamanı əhaliyə İTS-nın maliyyə mənbələri hesabına ilkin səhiyyə xidmətlərinin, təcili və təxirəsalınmaz tibbi yardımın göstərilməsinə təminat verən dövlətin hüquqi, iqtisadi və təşkilati tədbirlər sistemidir.

İcbari Tibbi Sığorta çərçivəsində hansi xidmətlərdən faydalanmaq olar?

Vətəndaşlara İcbari Tibbi Sığortanın Xidmətlər Zərfinə daxil olan 2550 sayda tibbi xidmət göstərilir. Onlardan bəziləri aşağıdakılardır:

-Təcili və təxirəsalınmaz tibbi yardım (o cümlədən ambulans xidməti);
-İlkin səhiyyə (ailə həkimi) xidməti;
-Ambulator şəraitdə müayinə və müalicə;
-Stasionar müalicə;
-Funksional-diaqnostik müayinələr (USM, KT, MRT və s.);
-Fizioterapevtik xidmətlər;
-Laborator müayinələr;
-Hamiləlik və doğuş xidməti;
-Təcili vaksinasiyalar (quduzluq, tetanus, ilan zəhəri əleyhinə və s.);
-Uşaqların peyvənd təqvimi əsasında planlı vaksinasiya;
-Cərrahi əməliyyatlar (o cümlədən dəyəri yüksək olan həyati vacib açıq və qapalı ürək-damar əməliyyatları, koxlear implantasiya və s.);
-Müxtəlif xəstəliklər üzrə ciddi dispanser müşahidə. 

Məlumat üçün bildirək ki, stasionar müalicə və təcili təxirəsalınmaz tibbi yardım zamanı istifadə olunan dərman və tibbi sərf Xidmətlər Zərfi çərçivəsində təmin edilir. Habelə, tibb müəssisəsində ambulator tibbi yardım çərçivəsində göstərilən bir sıra tibbi xidmətlərdə istifadə edilən anesteziya xidməti, dərman təminatı və tibbi sərf Xidmətlər Zərfi ilə təminata alınır.

Ambulator müalicə üçün həkim tərəfindən resept əsasında təyin olunan dərman vasitələri Xidmətlər Zərfinə daxil deyil.

-Xidmətlər Zərfinə hansı əməliyyatlar daxildir?

Xidmətlər Zərfinə 950-dən çox cərrahi əməliyyat daxildir. Təminata alınmış əməliyyatlar sırasında dəyəri yüksək olan əməliyyatlar əhalinin sağlamlığının və maddi rifahının təmin edilməsi üçün böyük əhəmiyyət kəsb edir. Həmin əməliyyatlar sırasına koxlear implantasiya əməliyyatı, oynaq endoprotezlərin yerləşdirilməsi, aorto-koronar şuntlama əməliyyatı, anevrizma əməliyyatları, anadangəlmə ürək qüsurlarının cərrahi müalicəsi, minimal invaziv üsulla həyata keçirilən kardiocərrahiyyə əməliyyatları (koronar stentlərin taxılması), habelə, oftalmoloji, travmatoloji, uroloji və neyrocərrahiyə əməliyyatlar daxildir.

Xidmətlər Zərfinə daxil olan cərrahi tibbi xidmətlərin siyahısı və tarifləri ilə Agentliyin rəsmi internet səhifəsində tanış ola bilərsiniz: https://its.gov.az/tibbi-xidmet/9

-Xidmətlər Zərfi ilə təminata alınmayan tibbi xidmətlər hansılardır?

Xidmətlər Zərfi ilə təminata alınmayan tibbi xidmətlərə əsasən dövlət proqramları çərçivəsində müalicəsi nəzərdə tutulan tibbi xidmətlər, kosmetoloji, stomatoloji xidmət, estetik prosedur və əməliyyatlar, orqan transplantasiyası, süni mayalanma, qazanılmış immun çatışmazlığı sindromunun müalicəsi (QİÇS) daxildir. Xidmətlər Zərfində təminata alınmayan tibbi xidmətlərdən istifadə edən şəxs Agentliyin icrasında olan dövlət proqramlarına daxil olan tibbi xidmətlər istisna olmaqla, öz maliyyə vəsaiti hesabına ödəniş etməlidir.

Aygün Osmanlı

Telegramda izləyin