"Zelenski qəhrəman deyil, qəhrəman olsaydı bu duruma düşməzdilər" - Niyaməddin Orduxanlı

"Zelenski qəhrəman deyil, qəhrəman olsaydı, bu duruma düşməzdilər. Qəhrəman o şəxs ola bilərdi ki, o, xalqını müharibədən yayındırardı. Ukraynanın tam suverenliyini bərpa edə bilərdi".

Bu sözləri AZXEBER.COM-a açıqlamasında Bütöv Azərbaycan Xalq Cəbhəsi Partiyasının (BAXCP) sədrinin ictimai və siyasi məsələr üzrə müavini Niyaməddin Orduxanlı deyib.

O, qeyd edib ki, Zelenski qəhrəman olsaydı, ən azından Rusiya ilə normal münasibətləri inkişaf etdirərdi:

"O gərək Rusiya ilə normal münasibətlərini davam etdirərdi. Rusiya ilə Ukrayna eyni xalqlardır. İndi kiminsə baxışı ilə Zelenski qəhrəman kimi görünə bilər. Bu da normal bir haldır. Bu gün ərazi bütövlüyünün böyük hissəsinin itirilməsi, ölkədə milyondan artıq qaçqının olması, burada şəhərlər viran qalması, Ukraynanın 30-40 il geriyə düşməsi deməkdir".

N. Orduxanlı həmçinin qeyd edib ki, biz unutmamalıyıq ki, Rusiya Azərbaycanın müttəfiq ölkəsidir:

"Azərbaycan bu müharibədə hər hansı bir iştirakçı tərəf deyil. Yəni bu, Rusiya ilə Ukrayna arasında gedən bir müharibədir. Bunlar da eyni kökənli xalqlardır. Azərbaycan ictimaiyyətinin münasibətinin birmənalı olması təbiidir. Ancaq biz unutmamalıyıq ki, Rusiya Azərbaycanın müttəfiq ölkəsidir. Orada da 3 milyona yaxın azərbaycanlı yaşayır. Onlar öz qazandıqlarını Azərbaycana, öz ailələrinə göndərirlər. Təbii ki, Ukrayna da Azərbaycan üçün strateji bir ölkədir, münasibətlərimiz çox yaxşıdır. Ancaq biz bir faktı unutmamalıyıq, Azərbaycan 44 günlük Vətən müharibəsi etdi, bu zaman biz Ukraynanın 5-10 nəfər vətəndaşını Ermənistanın əleyhinə fikir səsləndirmək kimi bir şeyin şahidi olduqmu? Yaxud da balaca bir Ermənistanla Ukraynanın münasibətlərinin pozulmasına şahidlik etdikmi? Yox.

O qeyd edib ki, Ukraynanın işğal olunmasının əleyhinədir:

"Təbii ki, biz başqa ölkənin işğalının, zəbt olunmasının birmənalı şəkildə əleyhinəyik. 30 il separatçılıqdan əziyyət çəkən bir dövlət kimi separatçılığın əleyhinəyik. Ukraynanın da ərazi bütövlüyünün pozulmasına haqq qazandıra bilmərik. Mən inanmıram ki, Azərbaycanda bir nəfər olsun ki, çıxıb Ukraynanın ərazi bütövlüyünün pozulmasına haqq qazandırsın, olmaz. Bu, beynəlxalq hüquqa da ziddir. Ancaq biz bu məsələdə nə Rusiyanın, nə də Ukraynanın apardığı müharibənin yanında yer ala bilmərik. Biz də istəyərik ki, bu məsələ sülh yolu ilə həll olunsun".

Telegramda izləyin