"Azərbaycan heç bir zaman dostunu və düşmənini unutmur"

Xəbər verdiyimiz kimi, Rusiya Federasiyası Dövlət Dumasının deputatı, Dumanın İqtisadi siyasət üzrə komitəsinin sədr müavini Delyagin Mixail Qennadyeviç yerli telekanallardan birinin efirində çıxışı zamanı Bakının neft mədənlərinə bomba zərbəsi endirməyi təklif edib. Mixail Delyagin iddia edib ki, Azərbaycan Rusiya üçün böyük təhlükədir və Bakının cəzalandırılması lazımdır. Daha sonra Delyagin Azərbaycanla bağlı fikirlərinin yanlış olduğu etiraf edərək, səhvinə görə üzr istədiyini bildirib. Qeyd edək ki, Rusiya Federasiyası Dövlət Dumasının deputatı, Dumanın İqtisadi siyasət üzrə komitəsinin sədr müavini Delyagin Mixail Qennadyeviçin son günlər kütləvi informasiya vasitələrində iki dövlət arasında olan qarşılıqlı fəaliyyətin prinsiplərinə zidd mövqe sərgiləyən çıxışları ilə bağlı Baş Prokurorluqda araşdırma aparılıb.

Belə ki, Mixail Delyagin 28 mart 2022-ci il tarixində Rusiya Federasiyasının "Rossiya 1" telekanalında yayımlanan verilişdə Azərbaycan Respublikasına qarşı təcavüzkar müharibəni başlamağa açıq çağırışlar edərək ölkəmizin enerji infrastrukturu və neft sənayesinin məhv edilməsi üçün taktiki nüvə silahından istifadə olunması barədə təxribat xarakterli çıxış edərək, sosial media platformasında bu barədə kütləvi sorğu keçirib.

Rusiya Federasiyasının vətəndaşı Mixail Delyaginin əməllərində Azərbaycan Respublikası Cinayət Məcəlləsinin 101.2 (təcavüzkar müharibəni başlamağa açıq çağırışlar), 214.2.3 (terrorçuluq-odlu silahdan və silah qismində istifadə olunan predmetlərdən istifadə etməklə törədilməklə hədələdikdə), 283.2.1 və 283.2.2-ci (milli, irqi, sosial və ya dini nifrət və düşmənçiliyin salınması) maddələrinin tərkib əlamətləri olduğundan 29 mart 2022-ci il tarixdə Azərbaycan Respublikasının Baş prokuroru tərəfindən həmin maddələrlə cinayət işi başlanmaqla ibtidai istintaqın aparılması Baş Prokurorluğun İstintaq idarəsinə həvalə olunub.

İttiham üçün əsas verən kifayət qədər sübutlar toplandığından 29 mart 2022-ci il tarixdə Mixail Delyagin Cinayət Məcəlləsinin qeyd edilən maddələri ilə təqsirləndirilən şəxs qismində cəlb edilərək, məhkəmənin qərarı ilə barəsində həbs qətimkan tədbiri seçilməklə İnterpol vasitəsilə beynəlxalq axtarışa elan edilib.

Məsələ ilə bağlı Sonxeber.az-a danışan Sosial Tədqiqatlar Mərkəzinin Mətbuat Xidmətinin rəhbəri Əziz Əlibəyli bildirib ki, Mixail Delyaginin beynəlxalq axtarışa verilməsi özlüyündə siyasi mahiyyət daşıyır:

"Bu həm də Azərbaycan dövlətinin iradəsinin göstəricisidir. Xalqımıza qarşı yönəlmiş hər hansı terror, təcavüz, silahdan istifadə etmək və digər səsləndirilən sərsəm fikirlərlə bağlı Azərbaycan öz iradə gücünü ortaya qoyur. Bu, Rusiya üçün də ciddi siqnaldır. Mixail Delyaginin çıxışı beynəlxalq hüquqa ziddir. Bizim üçün tək terrorçu Mixail Delyagin deyil, onunla yanaşı həm də Dağlıq Qarabağda fəaliyyət göstərən separatçı və qondarma rejimin rəhbəri Arayik Harutyunyandır. Bütövlükdə bu addım gələcək üçün hüquqi presedent yaradır. Azərbaycan heç bir zaman dostunu və düşmənini unutmur. Gələcəkdə Azərbaycan siyasi təzyiq kimi bu yoldan istifadə edə bilər. Bütövlükdə terrorçuların ələ keçirilməsi ilə bağlı dövlət özü də addım ata bilər. Təbii ki, Rusiya tərəfinin Mixail Delyaginini Azərbaycana verməsini gözləmirik. Amma onun aid olduğu "Ədalətli Rusiya-Həqiqət naminə" fraksiyasının rəhbəri Sergey Mironov bildirdi ki, Mixail Delyagininin söylədiyi sözlər onun şəxsi fikirləridir və buna görə də üzr də istədi. Amma söhbət ondan gedir ki, Azərbaycan tərəfi hüququn, diplomatiyanın, hərbin və bütövlükdə ikitərəfli, çox tərəflərin sökəndiyi beynəlxalq hüquq çərçivəsində öz dövlət iradəsini ortaya qoyur və bu addım gələcəkdə də belə hallarla qarşılaşan zaman addım atmaq üçün dövlətimizə zəmin hazırlayır".

Aysel Yusifqızı

Telegramda izləyin