Türkiyə Müdafiə Nazirliyindən Qara dənizdə üzən minalarla bağlı AÇIQLAMA

Türkiyə milli müdafiə naziri Hulusi Akar Qara dənizdə dreyf edən minalara qarşı görülən tədbirlərlə bağlı jurnalistlərin suallarını cavablandırıb.

O bildirib ki, heç kimə zərər vermədən bu təhlükəni aradan qaldırmaq üçün çalışırıq.

Akar Hərbi Dəniz Qüvvələri Komandanlığına aid mina axtarma gəmiləri və dəniz patrul təyyarələrinin hazır vəziyyətdə olduğunu vurğulayıb:

"Alınan hər bir bildiriş dəyərləndirilir və lazımi tədbirlər görülür. Dəniz nəqliyyatında heç bir problem yoxdur".

Hulusi Akar əlavə edib ki, Ukrayna limanlarında gözləyən türk gəmilərinin təcili və təhlükəsiz şəkildə təxliyyəsi ilə bağlı həm Rusiya, həm də Ukrayna ilə təmaslarını davam etdirirlər.

Nazir həmçinin qeyd edib ki, Türkiyə Mariupoldan dəniz yolu ilə dinc əhalinin və yaralıların təxliyyəsini təşkil etmək üçün gəmilər ayırmağa hazırdır.

Onun sözlərinə görə, Türkiyə tərəfi bu məsələdə Rusiya və Ukrayna strukturları ilə koordinasiyalı olaraq fəaliyyət göstərir:

"Ankaranın təxliyyə prosesinə dəstək verməyə hazır olması bizim müdafiə departamentimizə dəvət olunmuş Rusiyanın Türkiyədəki hərbi attaşesinin diqqətinə çatdırılıb. Oxşar təşəbbüs Rusiya hakimiyyətinə Türkiyənin Moskvadakı hərbi attaşesi vasitəsilə də ötürülüb".

O qeyd edib ki, Türkiyə Ukrayna xalqına humanitar yardım çatdırmaqda davam edir.

Türkiyəli siyasətçi xatırladıb ki, son həftələrdə o, rusiyalı və ukraynalı həmkarları Sergey Şoyqu və Aleksey Reznikovla dəfələrlə telefonla danışıb. Onun sözlərinə görə, İstanbulda Reznikovla da şəxsi görüşü olub.

Türkiyəli nazir həmçinin Rusiya Federasiyası və Ukrayna ilə aktiv təmaslar və türk gəmilərinin Ukrayna limanlarından təhlükəsiz çıxışı məsələsi barədə məlumat verib. Bundan başqa, Akar atəşkəslə bağlı razılaşmaların əldə olunmasının vacibliyini bildirib.

Telegramda izləyin