Süni mayalanmadan dünyaya gələn uşaqlar qüsurlu olur? - AÇIQLAMA

İndiki zamanda süni mayalanma artıq adi prosedurlardan biri hesab edilir, buna görə də onun haqqında geniş məlumat əldə etmək olar. Süni mayalanma – sonsuzluğun xüsusi müalicə üsuludur, bu zaman mayalanma qadın orqanizmindən kənarda baş verir. Bu proseduru seçən insanları narahat edən əsas məsələlərdən biri süni mayalanma yolu ilə dünyaya gələn uşağın sağlamlığıdır.

Ginekoloq Rəşad Sultan Sonxeber.az-a müsahibəsində bildirir ki, süni mayalanmanın həm mənfi, həm də müsbət tərəfləri var.

"Süni mayalanma zamanı aktual olan iki əsas məsələ var. Birincisi, uşaqların qüsurlu doğulması və ikincisi vaxtından əvvəl doğuş. İnsanların çoxu düşünür ki, süni mayalanmadırsa, deməli, uşaq qüsurlu doğulacaq. Bu, yanlış bir fikirdir. Onsuz da bütün hamiləliklərin 3-5 %-də qüsurlar olur. Bu, süni mayalanmada da ola bilər. Hətta əksinə, bəzən süni mayalanma proseduraları ilə, süni mayalanmaya əlavə olaraq, tibbi göstəriş olduğu təqdirdə, uşağın genetika və xromosomlarını da araşdırılıb qüsurlu olanları çıxarmaq imkanımız olur.

Ən əsas problem o olur ki, süni mayalanma zamanı 2-3 embrion qoyulduğundan çoxdöllü hamiləlik ehtimalı artır. Bu isə hamiləlik patologiyasıdır. Bu patologiya vaxtından əvvəl doğuşa gətirib çıxararsa, xəstəliyi olan, reanimasiyada yatan, beyin deffekti olan, nevroloji problemləri olan uşaqların doğulmasına gətirib çıxara bilər.

Uşaqlar arasında morbiditə (yeni doğulmuşun xəstəlik faizi) və mortalitənin (yeni doğulmuşun ölüm faizi) artması məhz vaxtından əvvəl doğuşun olması ilə bağlıdır.

Məsələyə birtərəfli yanaşmaq, pisləmək düzgün deyil, çünki süni mayalanma sonsuzluq sahəsində bir inqilabdır. Bir çox ailə bunun sayəsində uşaq sahibi olur".

Aygün Osmanlı

Telegramda izləyin