Qrip mövsümündə nə yemək lazımdır? - Diyetoloq əsas qidaları açıqladı

Qrip mövsümü getdikcə güclənir və məhz bu dövrdə orqanizmin daxildən dəstəklənməsi xüsusi əhəmiyyət daşıyır. Diyetoloqlar immun sisteminin viruslara qarşı daha yaxşı mübarizə aparmasına kömək edən qida və içkiləri açıqlayıblar.

Qaynarinfo xəbər verir ki, bu barədə "Fox News" məlumat yayıb.

Nyu-Cersi ştatından olan diyetoloq Erin Palinski-Ueyd bildirib ki, lif, fermentləşdirilmiş məhsullar və zəruri qida maddələri kifayət qədər qəbul edilmədikdə bağırsaq mikrobiomunda tarazlıq pozula və bu, immun sisteminə mənfi təsir göstərə bilər.

Problemin miqyasını göstərmək üçün qeyd edək ki, ABŞ Xəstəliklərə Nəzarət və Profilaktika Mərkəzlərinin (CDC) hesablamalarına görə, 2024-2025-ci illər qrip mövsümündə ABŞ-da təxminən 51 milyon qrip yoluxması qeydə alınıb.

1. Rəngarəng tərəvəz və meyvələr yeyin

Mütəxəssisin ilk tövsiyəsi olduqca sadədir: boşqab nə qədər rəngarəng olarsa, bir o qədər yaxşıdır.

"Xüsusilə tərəvəz və meyvələrdən ibarət rəngarəng qidalar yeyin. Bolqar bibəri, kivi, sitrus meyvələri və brokoli kimi məhsullar C vitamininin əla mənbələridir", deyə Palinski-Ueyd bildirib.

C vitamini immun sisteminin normal fəaliyyətində mühüm rol oynayır.

2. Fermentləşdirilmiş məhsulları rasiona daxil edin

Diyetoloq yoqurt, kefir və turş kələm kimi fermentləşdirilmiş məhsulların qəbulunu tövsiyə edir.

Bu qidalar bağırsaq mikrobiomunun sağlamlığını dəstəkləyir. Bağırsaq mikrobiomu isə immun sisteminin fəaliyyətində mühüm rol oynayır.

3. Lif qəbulunu artırın

Liflə zəngin qidalar da immun sağlamlığının qorunması baxımından əhəmiyyətlidir.

Palinski-Ueyd paxlalılar, qoz-fındıq və müxtəlif toxumları lifin yaxşı mənbələri kimi göstərib.

Lakin bir çox insan gündəlik rasionunda kifayət qədər lif qəbul etmir. Sentyabr ayında açıqlanan Amerika Kardiologiya Kollecinin hesabatına əsasən, ABŞ-da yetkin insanların yalnız 6 faizi gündəlik lif ehtiyacını tam ödəyir.

4. Zülal və sink qəbuluna diqqət yetirin

Mütəxəssisin sözlərinə görə, zülal və sink də immun sisteminin normal fəaliyyəti üçün vacibdir.

"Bunlar orqanizmimizin immun hüceyrələri yaratması üçün lazım olan əsas tikinti materiallarıdır", deyə diyetoloq vurğulayıb.

Bu maddələri yağsız ət, dəniz məhsulları, yumurta, balqabaq tumları və noxuddan əldə etmək mümkündür.

5. İnək südü də immuniteti dəstəkləyə bilər

İmmun sisteminin dəstəklənməsində gözlənilməz köməkçilərdən biri də adi inək südüdür.

Cənubi Karolina ştatından olan dietoloq Loren Manaker südün tərkibində vitamin və mineralların olduğunu, həmçinin orqanizmin maye ehtiyacının ödənilməsinə kömək etdiyini bildirib.

"Süddə olan A və D vitaminləri, sink və selen kimi bir sıra mühüm mikroelementlər immun sisteminin sağlam fəaliyyətini dəstəkləyir", deyə o qeyd edib.

Bir çox insan soyuqdəymə zamanı süd içməkdən çəkinir. Bunun səbəbi südün selik ifrazını artırdığına dair geniş yayılmış fikirdir. Lakin "Mayo Clinic"in məlumatına görə, bu iddianı təsdiqləyən elmi sübutlar məhduddur.

Palinski-Ueydin izahına görə, süd tüpürcəklə qarışdıqda ağızda və boğazda daha qalın örtük hissi yarada bilər. Bu da insanda bəlğəmin və seliyin artdığı təəssüratını doğurur. Əslində isə belə bir hiss onların daha çox istehsal edildiyi anlamına gəlmir.

Laktozanı həzm etməkdə çətinlik çəkən insanlara Manaker laktozasız südü tövsiyə edir. Belə süd adi inək südündəki əsas qida maddələrini saxlayır, lakin tərkibində laktoza olmur.

6. Kifayət qədər maye qəbul edin

Orqanizmin lazımi səviyyədə nəmləndirilməsi də sağlamlığın qorunması üçün vacibdir.

"Maye qəbulu insanın özünü yaxşı hiss etməsinə kömək edir. Maraqlıdır ki, o, tənəffüs yollarının da nəmlənməsini təmin edir. Bu yollar orqanizmin soyuqdəymə və qripə qarşı ilk müdafiə xətlərindən biridir", deyə Palinski-Ueyd bildirib.

Diyetoloq su, bulyon, yaşıl çay və zəncəfil çayı içməyi məsləhət görür.

7. Yuxuya, stressə və fiziki aktivliyə diqqət yetirin

Manakerin sözlərinə görə, güclü immun sisteminin qorunması üçün yalnız düzgün qidalanma kifayət deyil. Keyfiyyətli yuxu, stressin idarə olunması və müntəzəm fiziki aktivlik də mühüm əhəmiyyət daşıyır.

8. Vitamin əlavələrini ehtiyatla qəbul edin

Diyetoloqun fikrincə, qida vasitəsilə bütün zəruri maddələri kifayət qədər ala bilməyən insanlar üçün vitamin və mineral əlavələri faydalı ola bilər.

Lakin bu preparatları qəbul etməzdən əvvəl həkimlə məsləhətləşmək və dozalara diqqət yetirmək lazımdır.

Mütəxəssis xəbərdarlıq edir ki, vitaminlərin daha çox qəbul edilməsi həmişə daha yaxşı nəticə vermir. Bəzi vitamin və mineralların həddindən artıq qəbulu sağlamlığa zərər vura bilər.

Telegramda izləyin