Azərbaycan milli geyim mədəniyyətində xüsusən, qadın baş örtüyü əsrlər boyu xüsusi estetik, fəlsəfi və milli məna daşımışdır

"Azərbaycan cəmiyyətində dövlət-din münasibətlərinin sağlam təməllər üzərində qurulması ölkəmizdə formalaşan tolerantlıq mühiti vətəndaşların fərdi inanclarını sərbəst şəkildə ifadə etməsinə imkan yaradır. Bu kontekstdə vətəndaşların inancları ilə baölı geyim tərzi və baş örtüyü məsələsinə yanaşarkən, Azərbaycanın zəngin tarixi-mədəni irsinə və milli identikliyinə istinad etmək xüsusi əhəmiyyət daşıyır". Bu sözləri Sonxeber.az-a açıqlamasında millət vəkili Bəhruz Məhərrəmov bildirib.

Onun sözlərinə görə, Azərbaycan milli geyim mədəniyyətində xüsusən, qadın baş örtüyü əsrlər boyu xüsusi estetik, fəlsəfi və milli məna daşımışdır: "Azərbaycan qadınının əsas və qədim milli baş örtüyü UNESCO-nun Qeyri-maddi mədəni irs siyahısına daxil edilmiş kəlağayıdır. Kəlağayı, sadəcə, başı örtmək vasitəsi deyil, milli kimliyin, zərifliyin, ləyaqətin və əsrlərin süzgəcindən keçmiş mənəvi dəyərlərin daşıyıcısıdır. Milli ənənələrimizdə qadın geyimi hər zaman isməti, milli mentaliteti və estetik zövqü əks etdirmiş, cəmiyyətdə isə heç bir ayrı-seçkilik yaratmadan ümumi mədəni kodun tərkib hissəsi olmuşdur. Lakin, müasir dövrdə bəzi qadınların milli ənənələrdən fərqli olaraq, ərəbsayağı və ya müxtəlif yad mədəniyyətlərə xas olan qapalı örtük formalarından istifadə etməsinə də cəmiyyətdə mənfi qarşılanmır, əksinə bu məsələyə dövlət-cəmiyyət münasibətlərində həssaslıqla yanaşılır. Konstitusiyamıza əsasən, hər bir vətəndaşın vicdan və etiqad azadlığı qorunur, gündəlik həyatda dini inanclara uyğun yaşamaq hüququna hörmət edilir.

Hicab taxmaq və ya hər hansı digər geyim formasını seçmək fərdin şəxsi seçim müstəvisinə aiddir və bu, heç bir qadını dünyəvi həyat tərzini seçən vətəndaşdan üstün və ya aşağı mövqeyə qoya bilməz. Lakin məsələ təhsil ocaqlarına - xüsusilə ümumtəhsil məktəblərinə gəldikdə, fərdi etiqad müstəvisindən çıxaraq dövlətçilik və hüquqi nizamlama müstəvisinə keçməlidir".

Telegramda izləyin