"Dünyəvilik təhsil sisteminin müstəqilliyinin və bütün şagirdlər üçün vahid hüquqi prinsiplərin qorunmasıdır" - Könül Nurullayeva

"Bəzi qərəzli qüvvələrin məktəblərdə daxili intizam qaydalarının və vahid geyim forması ətrafında məsələləri məqsədli şəkildə siyasiləşdirməsi, ictimai narazılıq yaratmaq və cəmiyyətdə qarşıdurma formalaşdırmaq vasitəsinə çevirməyə çalışması yolverilməzdir. Bu qərəzli yanaşma, hər şeydən əvvəl, qanunun aliliyi, dünyəvi təhsil, təhsil müəssisələrinin siyasi təsirlərdən qorunması və uşaqların üstün mənafelərinin təmin edilməsi prinsiplərinə ziddir. Məktəb siyasi ambisiyaların həyata keçirildiyi deyil, bilik, tərbiyə və vətəndaş məsuliyyətinin formalaşdığı məkandır. Təhsil qaydaları ətrafında yaranan mübahisələr hüquqi çərçivədə və sağlam ictimai dialoq vasitəsilə həll edilməli, şagirdlər siyasi və ideoloji qarşıdurmaların iştirakçısına çevrilməməlidirlər". Bu sözləri Sonxeber.az-a açıqlamasında millət vəkili Könül Nurullayeva bildirib.
Onun sözlərinə görə, Azərbaycan dünyəvi dövlətdir: "Dünyəvilik təhsil sisteminin müstəqilliyinin və bütün şagirdlər üçün vahid hüquqi prinsiplərin qorunmasıdır. Vahid məktəbli forması da bu kontekstdə ümumi təhsil qaydalarının tərkib hissəsi kimi qiymətləndirilməlidir. Şəxsi dini inanclara hörmətlə yanaşmaq, eyni zamanda məktəblərdə müəyyən edilmiş qanuni tələblərə əməl olunmasını təmin etmək mümkündür.

Cəmiyyətimizi və gələcəyimiz olan gəncləri yad təsirlərdən qorumaq üçün isə, ilk növbədə, ailə və məktəb əməkdaşlığı gücləndirilməlidir. Uşaqlara milli-mənəvi dəyərlər, Azərbaycançılıq ideologiyası, vətənpərvərlik, qarşılıqlı hörmət və qanunlara ehtiram aşılanmalıdır. Bununla yanaşı, gənclərdə informasiya savadlılığı və müxtəlif ideoloji manipulyasiyaları ayırd etmək bacarığı inkişaf etdirilməlidir. İdeoloji təhlükəsizlik ön planda olmalıdır. Cəmiyyətn hər bir üzvü bu təhlükələrdən qorunmağın yollarını bilməlidir.

Təhsil qaydalarına hörmət, milli dəyərlərə sədaqət və qanunun aliliyi ətrafında birləşmək həm cəmiyyətimizin sabitliyi, həm də gələcək nəsillərin təhlükəsizliyi üçün mühüm şərtdir.
Prezident İlham Əliyev də bu günlərdə diqqəti ideoloji təhlükəsizliklərə yönəldərək, bu məsələnin vacibliyini bəyan etmişdi".

Telegramda izləyin