Pensiya yaşıyla bağlı deputatdan TƏNQİD: "Bizim ölkədə bütün əziyyət qadının üzərinə düşür"

Son günlər qadınlarla kişilərin pensiya yaşının eyniləşdirilmısi məsələsi gündəmdədir. Bunun nə dərəcədə doğru olması isə sual altındadır. Ümumiyyətlə, ölüm yaşının bu qədər aşağı düşdüyü bir zamanda pensiya üçün yaş həddinin 65 olması düzgündürmü?

Bundan əlavə, bir insan pensiya yaşına yetişmədən öldüyü təqdirdə yalnız onun öhdəliyində olan 18 yaşına çatmamış övladına təqaüd verilir. Amma bu insan illərlə çalışıb, əziyyət çəkib. 65 yaşlı insanın da çox istisna hallarda 18 yaşına çatmamış övladı ola bilər. Bu yaş həddinin olması məqsədəuyğundurmu?

Mövzuyla bağlı Sonxeber.az millət vəkili Razi Nurullayevdən münasibət öyrənib.

O bildirib ki, vətəndaşlarımızı ləyaqətli həyat, iş, siğorta ilə təmin edə bildiyimiz zaman bu məsələni gündəmə gətirə bilərik:

"Bu, qanunvericilikdə nəzərə alına bilər. 18 yaşında olan insan Azərbaycanda öz ayaqlarının üzərində dura bilmir. Çünki bizim məktəb və universitetlərdə şəxsiyyət yetişdirilmir. İnsanlar, demək olar ki, 25 yaşına kimi valideyndən asılı vəziyyətdə olur. Uşaqlara düzgün təhsil verilmir, şəxsiyyət kimi formalaşdırılmır. Bu baxımdan mən razıyam ki, 18 yaş limiti ləğv olunsun. Onlar, təbii ki, bu pula ehtiyac duyurlar, çox çətinlik çəkirlər. O səbəbdəndir ki, bir çox hallarda övlad təhsil ala bilmir, peşə öyrənə bilmir. Bu məsələyə toxunmağınız çox yaxşı oldu. Mən də mövzuyla bağlı məsələləri öyrənib parlamentin müvafiq iclasında, həm də komitə qarşısında qaldırıb müzakirəyə çıxarmağa çalışaram.

Bundan əlavə, qadınla kişinin pensiya yaşının bərabərləşdirilməsini mən doğru saymıram. Azərbaycan kimi cəmiyyətlərdə isə ümumiyyətlə doğru saymıram. Birincisi ona görə ki, bizim ölkədə bütün əziyyət qadının üzərinə düşür. O, uşaq böyüdür, yuxusuz qalır, ömrünün ən gözəl çağlarını övladının böyüməsinə həsr edir. Bu gün Azərbaycan qadınları gözəl, ləyaqətli həyat ilə, sığorta ilə, pulsuz müayinə-müalicə ilə tam olaraq təmin olunmayıb. Biz deyə bilmərik ki, onların bank servisinə, yüksək əmək haqqına, ləyaqətli həyata əlçatanlığı var. Azərbaycanda qadınlar var ki, həyatı boyu bir dəfə də olsun istirahət yerində, sanatoriyada olmayıb, bəlkə də, heç vaxt restoranda da oturmayıblar, olsalar da, ancaq toy məclisində iştirak edəndə gediblər.

Ona görə də, bütün bunların hamısının Avropada olduğu kimi, bizə tətbiq olunmasını doğru saymıram. Biz nə vaxt vətəndaşlarımızı ləyaqətli həyat, iş, siğorta ilə təmin edə bilsək, o zaman bu məsələni gündəmə gətirə bilərik. Başqa hallarda bu mövzunun gündəmə gəlməsi ədalətsizdir".

Aysel SƏFƏRZADƏ

Telegramda izləyin