"Dünya Azərbaycanlılarının V Qurultayı Zəfər Qurultayı kimi tarixə düşəcək" - Emil Əkbərov

Dünya Azərbaycanlılarının V Qurultayı Şuşada keçiriləcək. Tədbirdə 65 ölkədən 400 nəfərə yaxın diaspor nümayəndəsinin iştirakı gözlənilir. Qurultayın rəsmi açılış mərasimindən sonra Diasporla İş üzrə Dövlət Komitəsinin fəaliyyətinə dair hesabat verilməsi, "Post-müharibə dövründə Azərbaycan diasporunun qarşısında duran vəzifələr", "Qarabağın bərpası və yenidən qurulmasına Azərbaycan diasporunun töhfələri" mövzularında müzakirələrin təşkili planlaşdırılır.

Bununla bağlı Sonxeber.az-a danışan "BİG Media" MMC-nin direktoru Emil Akbarov bildirib ki, Dünya Azərbaycanlılarının V Qurultayının Azərbaycanın mədəniyyət paytaxtı Şuşa şəhərində keçirilməsi möhtəşəm və qürurverici hadisədir:

"Bu tədbiri həm də Dünya Azərbaycanlılarının Zəfər Qurultayı da adlandırmaq olar. Hazırda hansı ölkədə yaşamasından asılı olmayaraq, qurultaya təşrif buyuracaq hər bir azərbaycanlı Türk dünyasının paytaxtı, Qarabağın tacı olan Şuşanı 30 ildən sonra görmək xoşbəxtliyini yaşayacaq".

Emil Akbarovun sözlərinə görə, 4 ilə yaxındır ki, Azərbaycan diasporu çox mühüm layihələrə imza atıb:

"Bu layihələrin hazırlanmasında Diasporla İş üzrə Dövlət Komitəsinin və bu quruma 4 ilə yaxındır ki, sədrlik edən Fuad Muradovun zəhməti böyükdür. Qeyd edim ki, 31 ölkəni əhatə edən 14 Koordinasiya Şurasının, 12 ölkədə 18 Azərbaycan Evinin yaradılması (Tallin, Varşava, Budapest, Brüssel, Zalsburq, Barselona, Köln, Berlin, Münhen, Kiyev, Odessa, Ankara, İğdır, Qahirə, Saloniki, Tbilisi, Marneuli və Qardabani şəhərləri) təqdirəlayiqdir. Xüsusilə də biz Azərbaycan diasporunun gücünü Tovuz döyüşlərində və 44 günlük Vətən müharibəsi dövründə gördük. Həmin dövrdə Erməni vəhşiliyini bütün çılpaqlığı ilə dünyaya çatdıran Azərbaycan diasporu 30-dan çox ölkədə 200-dək aksiya keçirərək Ali Baş Komandanın və ordumuzun yanında olduğunu nümayiş etdirdi".

Emil Əkbərov vurğulayıb ki, 30 ildən sonra Qarabağın tacı olan Şuşada belə bir mühüm tədbirin keçirilməsini 44 günlük Vətən müharibəsində əldə etdiyimiz qələbənin növbəti mərhələsi kimi dəyərləndirmək olar:

"Həmçinin, Dünya Azərbaycanlılarının V Qurultayı Qarabağın işğaldan azad edilməsindən sonra diasporumuzun ilk böyük görüşü olacaq. Dünya Azərbaycanlılarının V Qurultayında Müzəffər Ali Baş Komandan, Qalib Sərkərdə kimi çıxış edərək, tarixi Zəfərimizdən böyük qürurla bəhs edəcək.

Bu möhtəşəm qələbəni və qürurverici anları bizə yaşadan Ali Baş Komandana və ərazi bütövlüyümüz uğrunda canlarını fəda edən şəhidlərimizə, qazilərimizə təşəkkür edirəm. Hesab edirəm ki, Dünya Azərbaycanlılarının V Qurultayı Zəfər Qurultayı kimi tarixə düşəcək".

Aysel Yusifqızı

Telegramda izləyin