Ramazan bayramında kimlər fitrə zəkatı verməyə bilər? - AÇIQLAMA

Artıq mübarək Ramazan ayının son günlərini yaşayırıq. Bildiyimiz kimi, Ramazan ayının sonunda qeyd olunan bayram ərəfəsində imkanı olan şəxslər fitrə zəkatı çıxardırlar. Bəs fitrə zəkatı nə qədər olmalıdır, nə vaxta qədər çıxardılmalıdır və kimlər fitrə verməyə bilər?

Məsələ ilə bağlı Sonxeber.az-a Qafqaz Müsəlmanları İdarəsinin sədr müavini Fuad Nurullayev açıqlama verib.

O bildirib ki, ehtiyacları çox olan, kasıb insanlar fitrə zəkatı verməyə bilərlər:

"Ramazan ayının orucunu tutan, riayət edən, eləcə də üzrlü səbəblərdən tuta bilməyən insanların hər biri bilməlidir ki, boynunda bir haqq var və fitrə zəkatı çıxartmalıdır.

Fitrə zəkatı verən adamın maddi imkanı orta və yüksək səviyyədə olmalıdır. Ailəsini güclə dolandıran, borc-xərci çox olan, hətta 5 manata ehtiyacı olan insanlar fitrə zəkatı çıxartmırlar.

Şəriət baxımından, fitrə zəkatı ən çox yeyilən ərzaqdan (buğda, düyü, un, xurma və s.) 3 kiloqram miqdarında hesablanır. İmkanı daha çox olanlar daha yüksək məbləğdən hesablasınlar.

Qafqaz Müsəlmanları İdarəsinin Qazilər Şurasının verdiyi fətvaya əsasən tövsiyə olunur ki, hər bir iilə başcısı ailəsi üçün 10-15 manat fitrə zəkatı çıxartsın. İmkanı daha artığına çatırsa, daha çox olsun.

Fitrə zəkatı bayram axşamı çıxardılır. Məsələn, sabah bayram olacaqsa, artıq bu gün axşam, şam namazı ərəfəsində və ya namazdan sonra zəkat çıxardılmalıdır. Lakin ailə üzvləri şam namazı ərəfəsində hesablanır. Əgər şam namazından əvvəl körpə dünyaya gələrsə, hətta onun üçün də fitrə çıxartmaq vacib olur.

Əgər bayram axşamı ailə üzvlərindən bir neçəsi uzaqdadırsa, evdə yoxdursa, onların adına fitrə zəkatı çıxartmaq vacib olmur. Lakin bir ailə başcısı əsgər olan övladı üçün və ya digər ailə üzvlərinin adından fitrə çıxarmaq istəsə, o zaman onlara bildirməlidir ki, 2-ci dəfə fitrə zəkatı çıxartmasınlar.

Burada həddi buluğ məsələsi, yaş həddi, kişi-qadın məsələsinin fərqi yoxdur. Hətta şam namazına qədər evdə qonaqlar olsa və namaza qədər evi tərk eləməsələr, o qonağın da fitrə zəkatını ev sahibi mütləq çıxartmalıdır.

Məsləhət görülür ki, ərzaq alıb aparmaq əvəzinə, onun qiymətini hesablayıb, həmin məbləğdə pul verilsin. O zaman zəkatı alan kasıb şəxs bu pulu, xəstəsi varsa, dərmanına, körpəsi varsa, paltarına, dərsə gedən uşağı varsa, dərs ləvazimatına xərcləyə və bir sözlə, öz ehtiyaclarına sərf edə bilər.

Fitrə zəkatı yaxın qonşu, qohumlarından olan, tanıdığı kasıb şəxslərə verməlidir. Bayram günü müxtəlif "peşəkar" dilənçilər qapıya gələ bilər, onlara hamılıqla fitrə zəkatı vermək düzgün deyil. Boş qaytarmaq istəməsələr, cüzi bir məbləğ vermək olar. Amma ailə fitrə zəkatını tanıdığı insana, ehtiyacı olan şəxsi dəqiqləşdirib, sonra verməlidir.

Ata, ana, bacı, qardaş, əmi,dayı, xala, bibiyə fitrə zəkatı verməzlər. Onlara yardım etməlidirlər. Fitrə zəkatı verməməlidirlər. Çünki onlar birinci dərəcəli qohumlar, ən yaxın insanlardır və qohumluq əlaqəsinə görə mümkün qədər onlara əl tutulmalıdır.

Çıxarılan fitrə zəkatı bayram namazına qədər çatdırılsa, daha gözəldir. Bayram namazına qədər çatdırılmasa, zöhr namazına qədər çatdırılsın. Gec olsa belə, fitrə düşən şəxsi axtarıb, tapıb o məbləğ mütləq verilməlidir.

Ramazan bayramınız mübarək olsun!"

ZAİRA AKİFQIZI

Telegramda izləyin