"Location" klubunda xəsarət alanlara yardım edən şəxs DANIŞDI

Bildiyimiz kimi, aprel ayının 3-də "Location" klubunda partlayış baş verib. Nəticədə 4 nəfər dünyasını dəyişib, 37 nəfər isə müxtəlif dərəcəli xəsarətlərlə xəstəxanaya yerləşdirilib.

Onlardan biri Fariz Məmmədzadədir. O, videoların birində dərman ala bilmədiyini, ağrılardan əziyyət çəkdiyini, qarşı tərəfin heç bir dəstəyi olmadan, öz hesabına dövlət xəstəxanasında 2 dəfə əməliyyat olunduğunu bildirib.

Mövzu ilə bağlı Sonxeber.az saytının əməkdaşları "Location" klubunu işlədən və hazırda həbsdə olan Orxan Səfərovun qardaşı, "Location" klubunun da aid olduğu "Messer Food" şirkətinin digər restoranı üzrə təsisçi Elşən Səfərovdan açıqlama alıb.

O, bir çox xəsarət alanları, eləcə də Fariz Məmmədzadəni öz hesablarına özəl klinikada müalicə etdirdiklərini bildirib:

"Bəzi xəsarət alan şəxslər oldu ki, öz hesablarına müalicə aldılar. Onlar dost-tanışlardır. Sağ olsunlar! Hətta bu gün də bizə yardım etməyə hazır olduqlarını bildirirlər. Biz Fariz bəyin müalicəsini etdirmişik. Hətta xəstəxanadan çıxdıqdan sonra demişik ki, müalicə üçün ehtiyac yaranarsa, yenidən "MedEra Hospital"a gedə bilərlər. Bütün müalicəni biz öz üzərimizə götürmüşük.

Bacardığımız qədər vəfat edənlərin yası üçün, xəsarət alanların sağalması üçün dəstək olmağa çalışırıq.

Biz "etmirik" deməmişik. Bu gün bəzi saytlarda belə başlıq yazırlar: "Dedilər, get nə istəyirsən elə, ölən ölüb, tutulan tutulub". Deyə bilərdik ki, "onsuz da tutulan tutulub", amma bunu etmədik, əksinə, dəstək olmağa çalışdıq. Klinikadan soraqlaşıb, araşdıra bilərsiniz. Biz təkcə Farizin müalicəsi üçün 15961 manat ödəmişik. Niyə birtərəfli açıqlamalar alırlar, anlamırıq.

Birtəhər, borc-xərclə edirik. Bu gün də deyirik ki, Fariz Məmmədzadənin müalicəyə ehtiyacı varsa, "MedEra Hospital"da etdirsin, özümüz ödəyəcəyik.

Fariz bəy deyir ki, 5 nömrəli xəstəxanada 2 dəfə əməliyyat olunub. Araşdırın, xahiş edirəm. Görün, hansı əməliyyat olunub? Həkimlərlə danışın, qollarına baxın. Axı əməliyyat olunmayıb".

Daha sonra adı çəkilən hospitalın həkimlərindən biri olan Rinat Murtuzəliyev saytımıza açıqlama verib.

O bildirib ki, klinikaya gətirilənlər arasında vəziyyəti ağır və orta ağır olanlar olub:

"Çıxanların vəziyyəti yaxşı olduğundan biz onları evə buraxdıq. 1 ağır xəsarət alan Seneqallı Samira xanımdır ki, ona dəri köçürmə əməliyyatı olunmalıdır. Hazırkı vəziyyətdə bu, mümkün deyil. Lakin ilk dəriköçürmə əməliyyatı qollarında, ikinci dəfə isə ayaqlarında ediləcək. Samira xanım ən azı 1 ay hələ burada qalmalı olacaq. Fariz bəy isə nə dövlət xəstəxanasında, nə də bizim klinikamızda əməliyyat olunmayıb. Müalicəsi bitib. Sadəcə həftədə 2 dəfə sarğısını dəyişməyə gəlir".

Qeyd edək ki, əməkdaşlarımız Seneqaldan olan Samira xanımı da ziyarət ediblər.

O, hər şeyin yaxşı olduğunu deyib:

"Həkimlər sağ olsunlar, necə lazımdır, yüksək səviyyədə qulluq edirlər. Artıq səhhətim yaxşılaşmağa doğru gedir. Hər kəsə minətdaram".

Sonxeber.az saytı qarşı tərəfin fikrini örənmək üçün Fariz Məmmədzadə ilə əlaqə saxlayaraq, onun əməliyyat olunub-olunmadığını öyrənmək istəyib.

Lakin Fariz Məmmədzadə bu sualın cavabını qardaşından soruşmağımızı istəyib:

"Mən bilmirəm, siz kimsiniz. Həqiqətən jurnalist olduğunuzu bilmirəm. Əməliyyat olunub-olunmamağımı isə ailəmlə bölüşə bilərəm. Heç kimə mən bu barədə məlumat vermirəm. Əməliyyat olunub-olunmadığımı qardaşımdan soruşun, həmin an narkozlu olduğumdan bu barədə məlumatsızam ".

Telegramda izləyin