"Heydər Əliyev zəmanəmizin ən böyük şəxsiyyəti kimi tarixə düşdü" - Emil Əkbərov

"Bu gün müasir müstəqil Azərbaycan dövlətinin qurucusu, xalqımızın Ümummilli lideri Heydər Əliyevin anadan olmasının 99-cu ildönümüdür. Xalqımız və dövlətimiz qarşısında müstəsna xidmətləri olan Ulu Öndər Heydər Əliyevin əziz xatirəsini dərin hörmət və ehtiramla yad edirik".

Bu sözləri Sonxeber.az-a danışan "BİG Media" MMC-nin direktoru Emil Akbarov deyib.

Emil Akbarov qeyd edib ki, Ulu Öndər Heydər Əliyev bir çox cəhətlərinə görə nadir tarixi şəxsiyyət kimi Azərbaycan xalqının yaddaşına həkk olunub:

"Ümummilli liderimiz ömrünü xalqının azadlığı, istiqlalı, Vətəninin müstəqilliyi, insanların xoşbəxt, təhlükəsiz, rahat yaşaması naminə apardığı mübarizəyə həsr etdi və başladığı haqq-ədalət mübarizəsi onun layiqli davamçısı Ali Baş Komandan İlham Əliyev tərəfindən Zəfərlə başa çatdırıldı. 1969-cu ildə Ulu Öndər Heydər Əliyev respublikamıza rəhbərliyə gəldiyi gündən Azərbaycanın müstəqilliyi, xalqımızın öz haqqına sahib çıxması uğrunda mübarizəyə başlayıb və bu işi böyük uzaqgörənliklə aparıb. O, hər zaman Vətəninə və xalqına olan sevgisini özünün və ailəsinin həyatından üstün tutub. Məhz bu səbəbdən xalqın çoxsaylı xahişləri, təkidli tələb və müraciətləri ilə yenidən siyasi hakimiyyətə qayıdan Ümummilli liderimiz Azərbaycanı təhlükələrdən, parçalanmaqdan və yenidən hansısa ölkənin müstəmləkəsinə çevrilməkdən xilas etdi. Onun rəhbərliyi ilə müstəqil dövlətimiz çox böyük uğurlar qazandı. Ən önəmlisi isə odur ki, Ulu Öndər Heydər Əliyev tərəfindən Azərbaycanın sürətli, hərtərəfli və uzunmüddətli inkişaf strategiyası hazırlandı. Məhz onun bütün sahələrdə, eləcə də ordu quruculuğunda təməlini qoyduğu və cənab Prezident İlham Əliyev tərəfindən uğurla davam etdirilən məqsədyönlü siyasət nəticəsində Azərbaycan qısa müddət ərzində möhtəşəm zəfərə imza ataraq ərazi bütövlüyünü bərpa etdi".

Emil Akbarov Heydər Əliyevin zəmanəmizin ən böyük şəxsiyyəti kimi tarixə düşdüyünü vurğulayıb:

"Azərbaycan dövləti var olduqca, onun zəhmətləri, fədakarlığı unudulmayacaq və xalqımızın qəlbində daim yaşayacaq. Ulu Öndər xalqımızın azadlığı, istiqlalı, Azərbaycanın müstəqilliyi, inkişafı yolunda əzmlə, fədakarlıqla mübarizə apardı, şərəfli, mənalı ömür yolu keçdi, bütün ömrünü xalqın yaxşı yaşaması, ümumiyyətlə, dinindən, dilindən, siyasi baxışlarından, milliyyətindən asılı olmayaraq, bütün insanlara eyni münasibətin bəslənilməsi üçün apardığı mübarizəyə həsr etdi.

Bu gün cənab Prezident İlham Əliyev atasının başlatdığı siyasəti uğurla davam etdirərək Azərbaycanı regionda diqtə edən və düşməni lərzəyə gətirən dövlət səviyyəsinə çatdırıb. Ulu Öndər Heydər Əliyev hər zaman çıxışlarında tezliklə Şuşamıza və Qarabağımıza yenidən qayıdacağımızı qeyd edirdi. Bu gün onun bu arzusunu oğlu və layiqli davamçısı, cənab Prezident İlham Əliyev reallaşdırdı.

Əminəm ki, bu gün Ulu Öndər Heydər Əliyev həyatda olsaydı, bu möhtəşəm qələbə münasibəti ilə, bütün Azərbaycan xalqı kimi, o da oğlu ilə qürur duyardı. İnanıram ki, dahi şəxsiyyət Heydər Əliyevin layiqli davamçısı, cənab Prezident İlham Əliyevlə dövlətimizin uğurları davamlı olacaq və o, regiondakı mövqeyimizi daha da möhkəm edəcək.

Aysel Yusifqızı

Telegramda izləyin