Azərbaycanın karbohidrogen ehtiyatları Avropanın Rusiya qazına ehtiyacını ödəyə bilər? - Politoloqdan AÇIQLAMA

Qazaxıstan Prezidenti Kasım-Jomart Tokayevin Azərbaycana səfəri gözlənilir. Bu səfər Qazaxıstan-Azərbaycan münasibətlərinə hansı töhfə verə bilər?

Bununla bağlı Sonxeber.az-a açıqlama verən politoloq Qabil Hüseynli bildirib ki, Qazaxıstan nefti və qazı Azərbaycan vasitəsilə Avropa bazarına çıxarıla bilər:

"Qazaxıstan-Azərbaycan münasibətləri istər Nursultan Nazarbayevin, istər Heydər Əliyevin, istərsə də İlham Əliyev və Tokayevin dövründə normal olub. Bu ölkələr bir-birini başa düşür və Türk dünyasının birləşməsində böyük rol oynayıblar. Qazaxıstan və Azərbaycan böyük bir layihə üzərində işləyirlər. Söhbət Qazaxıstan nefti və qazının Azərbaycan vasitəsilə Avropa bazarına çıxarılmasından gedir. Bu, çox böyük bir layihədir və həyata keçərsə, Özbəkistan və Türkmənistan kimi digər türkdilli respublikaların da bu prosesə cəlb olunması ehtimalı var.

Beləliklə, Orta Asiya respublikalarının və Azərbaycanın karbohidrogen ehtiyatlarının Avropa bazarına çıxarılması Avropanın Rusiya qazına və neftinə olan ehtiyacına alternativ ola bilər. Üstəlik, Azərbaycanla Qazaxıstan arasındakı ticarət əlaqələri də inkişaf etdiriləcək və bu əlaqələr gələcəkdə ortaq bazarın yaranmasına kömək edəcək".

Şəbnəm Lətifi

Telegramda izləyin