Milli Qəhrəman Mübariz İbrahimov evində anıldı - VİDEO

"Canım atam və anam. Məndən ötəri darıxmayın. Vətənin dar günündə artıq ürəyim dözmür. Şəhid olanadək bu şərəfsizlərin üzərinə gedəcəyəm. Şəhid olsam, ağlamayın" .

Bu sətirlər Milli Qəhrəman Mübariz İbrahimovun ailəsinə yazdığı son məktubundandır. Bu məktub yazılan vaxt, 2010-cu ildə, Mübariz İbrahimov hələ şəhid olmamışdan bir az əvvəl onun doğulduğu evin fasadında qaranquşlar yuva salmışdı.

Həmin ilin iyunun 18-də dirisinə yaxın düşə bilməyən ermənilər, qəhrəmanımızın cansız, amma üzündəki şəhidliyin gülərüzlüyünə heyrət və qorxu ilə baxanda elə biz də nə baş verdiyini dərk edə bilmirdik.

Bu gün sözügedən Milli Qəhrəmanımız Mübariz İbrahimovun anım günüdür. Şəhidimiz Biləsuvar rayonunun Əliabad kəndindəki ata evində anılıb. Anım tədbirində şəhidin ailə üzvləri, rayon rəsmiləri, ictimaiyyət nümayəndələri iştirak ediblər.

Gizir Mübariz İbrahimov 2010-cu il iyunun 19-da gecə təkbaşına iki ordu arasındakı bir kilometrlik minalanmış sahəni keçərək Ermənistan silahlı qüvvələrinin çox sayda əsgər və zabitinə gözlənilməz həmlə edib. 5 saat onlarla təkbətək döyüşüb. Düşməni ağır itkilərə məruz qoyan hərbçimiz onların zəif cinahlarını üzə çıxarıb. Azərbaycan döyüşçüsü səhər saatlarında qeyri-bərabər döyüşdə qəhrəmancasına həlak olub. Oğlunun şəhid xəbərini təmkinlə qarşılayan anası Şamama İbrahimova deyir ki, oğlunu yuxularında tez-tez görür.

"Şəhid olsam ağlamayın". Bəli, İkinci Qarabağ müharibəsində yüzlərlə şəhid anasına yazılan məktublarda məhz bu cümlə yer alır. "Mübariz kimi olacam ifadələri" həmin məkttublarda xüsusi qətiyyətlə yazılıb. Mübarizin anasını, 44 günlük müharibə zamanı və sonra özlərinin yanında hiss edən, yaraları hələ qaysaq bağlamamış digər şəhid anaları da bu gün milli qəhrəmanın anım gününə toplaşmışdılar.

Adı kimi özü də mübariz olan qəhrəmanımız bu gün Azərbaycan əsgərinin qəhrəmanlıq rəmzidir.

Telegramda izləyin