"Qəhrəman əsgərlərimiz şəhidimizin qisasını artıqlaması ilə alacaqlar" - DEPUTAT

Xəbər verdiyimiz kimi, Rusiya Federasiyası sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri avqustun 3-ü, səhər saatlarında Laçın rayonu istiqamətində yerləşən Azərbaycan Ordusunun bölmələrinin mövqelərini intensiv atəşə tutub. Nəticədə, müddətli həqiqi hərbi xidmət hərbi qulluqçusu əsgər Kazımov Anar Rüstəm oğlu aldığı güllə yarasından şəhid olub.

Bununla bağlı Sonxeber.az-a danışan deputat Nəsib Məhəməliyev bu gün erməni terrorçularının növbəti təxribatları nəticəsində şəhid olan əsgərimizə Allahdan rəhmət diləyərək, ailəsinə, doğmalarına səbr arzulayıb:

"Əminəm ki, qəhrəman əsgərlərimiz şəhidimizin qisasını artıqlaması ilə alacaqlar. Ermənilər başa düşməlidir ki, Azərbaycan əsgərinə atəş açmaq onlara baha başa gələ bilər.

Təxribat Qarabağın Laçın rayonunda, Rusiya sülhməramlılarının məsuliyyətində olduğu ərazidə baş verib. Əfsuslar olsun ki, bu, nadir hal deyil. Son günlər qanunsuz erməni silahlı dəstələri tərəfindən törədilən təxribatlar intensiv xarakter daşımağa başlayıb. Bunun əsas səbəbi isə, Ermənistanın öz üzərinə düşən öhdəlikləri yerinə yetirməkdən yayınmaq, nizamlanma prosesində vaxtı uzatmaqdır.

Konkret olaraq, 10 noyabr üçtərəfli razılaşmaya görə, erməni silahlıları tam şəkildə Qarabağdan çıxarılmalı, Zəngəzur dəhlizi açılmalı, sərhədlərin delimitasiya və demarkasiya işlərinə başlanılmalı idi. Lakin bu müddəalar icra olunmadı. Bölgədə gərginlik qalmaqdadır. Nə qədər ki, Ermənistan öhdəlikləri yerinə yetirməyib, sülhün əldə olunmasından danışmaq tezdir".

Aysel Yusifqızı

Telegramda izləyin