"Ordu quruculuğunun əsas istiqamətlərindən biri..." - Deputatdan AÇIQLAMA

"Tarixdə özünü təsdiq etmiş belə bir deyim var: öz ordusunu qura bilməyən dövlət, xalq yad orduları bəsləməyə məcburdur. Müasir dünyada gedən proseslər dövlətlərin təhlükəsizliyinin, ərazi bütövlüyünün təmin olunması üçün silahlı qüvvələrini ən müasir döyüş silahları, texnikası ilə təchiz etməyi, döyüş qabiliyyətini davamlı şəkildə inkişaf etdirməyi şərtləndirir. Nəzərə almalıyıq ki, yerləşdiyimiz Cənubi Qafqaz regionu tarixən müxtəlif qlobal güclərin geosiyasi maraqlarının toqquşduğu coğrafiyadır. Eyni zamanda, Ermənistan kimi, digər millətlərlə birgə yaşayış mədəniyyətinin olmadığı, daima gözü başqa xalqların torpağında olan bir dövlətlə qonşuluq bu sahənin inkişafına xüsusi diqqət tələb edir".

Bu sözləri Sonxeber.az-a danışan deputat Nəsib Məhəməliyev deyib.

O vurğulayıb ki, Prezident, Silahlı Qüvvələrin Ali Baş Komandanı İlham Əliyevin fəaliyyətə başladığı ilk gündən ordu quruculuğuna xüsusi diqqət yetirməsi, ildən-ilə dövlət büdcəsində müdafiə xərclərinin artırılması, ən müasir silahların, texnikanın alınması, müxtəlif fərqli sistemlərin təcrübəsinin mənimsənilməsi ilə şəxsi heyətin döyüş qabiliyyətinin təkmilləşdirilməsi öz müsbət nəticəsini verdi. Qarabağ işğaldan azad oldu, ölkənin ərazi bütövlüyü təmin olundu:

"Lakin əfsuslar olsun ki, problemlər bununla bitmədi. Ermənistan, ona havadarlıq edən qüvvələr bölgədə dayanıqlı sülhün olmasında maraqlı görünmürlər və biz, dövlət olaraq, bu çağırışlara hazır olmalıyıq.

Ordu quruculuğunun əsas istiqamətlərindən biri ən müasir standartlara cavab verən silahların, döyüş texnikasının alınması və ölkədə istehsalının təşkil edilməsidir".

Deputat Bakıda keçirilən ADEX-2022 sərgisinin əhəmiyyətinə də toxunub:

"Bakıda keçirilən ADEX-2022 sayca dördüncü sərgidir və Azərbaycanın müdafiə sənayesinin inkişafında xüsusi əhəmiyyətə malikdir. Sərgidə 26 ölkədən 200-ə qədər şirkətin təmsil olunması, silah satışı bazarında ciddi rəqabəti göstərir. Ələlxüsus, milli müdafiə sənayemizin istehsalı olan pilotsuz uçuş aparatları, zərbə dronları, dron-kamikadzeləri, atış silahları, snayper tüfəngləri hər birimizi qürurlandırdı. Yeni silah növlərinin, döyüş texnikalarının müştərək istehsalı barədə əldə olunan razılıqlar və gələcəkdə ixrac imkanlarının nəzərdə tutulması, ölkəmizdə müdafiə sənayesinin perspektivlərindən xəbər verir.

Qardaş Türkiyənin geniş çeşiddə məhsullarla təmsilçiliyi, dünya silah bazarında türk silahlarının daha etibarlı imicə malik olması, rəqabət qabiliyyətliyyətini günü-gündən artırması hər birimizi sevindirir.

İsrailin və digər dost dövlətlərin sərgidə iştirakları, öz təcrübələrini bölüşmələri tədbirin əhəmiyyətini və ölkəmizə marağı artırır.

Tarix boyu silah biznesi ən gəlirli sahələrdən biri hesab olunub. Dövlət başçımızın müdafiə sənayesini inkişaf etdirməkdə əsas məqsədi, Silahlı Qüvvələrin mümkün qədər yerli silahlarla təchiz olunması ilə yanaşı, iqtisadiyyatın qeyri-neft sektorundan asılılığın aradan qaldırılmasıdır".

Aysel Yusifqızı

Telegramda izləyin