"Ermənistana təsir edə biləcək bir neçə ciddi qlobal güc mövcuddur" - Politoloq

Gürcüstanın Baş naziri İrakli Qaribaşvili BMT Baş Assambleyasının 77-ci sessiyasındakı çıxışı zamanı Gürcüstanın Ermənistanla Azərbaycan arasında vasitəçi olmağa hazır olduğunu bildirib.
Bununla bağlı Sonxeber.az-a danışan politoloq Anar Əliyev bildirib ki, Ermənistana təsir edə biləcək dövlətlər tam obyektiv olmayana qədər Gürcüstanın təşəbbüsü ciddi nəticə əldə olunacağına inam formalaşdırmır:
"Gürcüstan bu günə qədər bir neçə dəfə Ermənistan və Azərbaycan rəsmilərinin görüşünə ev sahibliyi edib. İlk dəfə müharibədən sonra Ermənistan və Azərbaycan xarici işlər nazirlərinin ilk görüşünün təşkil olunmasını məhz Gürcüstan irəli sürüb və buna nail olunmuşdur. Təəssüf ki, Ermənistan görüşlər zamanı razı olunan qərarları sabotaj edərək üzərlərinə götürdükləri öhdəlikləri yerinə yetirmirlər. Bu baxımdan hesab edirəm ki, Gürcüstan baş nazirinin növbəti təklifi Cənubi Qafqazda sülh prosesinin əldə olunmasında mühim addım kimi qiymətləndirsək də, belə bir görüş keçirsək Ermənistan yenə də görüşün nəticələrini sabotaj etməyə çalışacaq. Ermənistan müxtəlif formatlı görüşlərdə mümkün qədər müzakirəyə hazır olduğu görüntüsü formalaşdırmaga çalışır. Amma təəssüf ki, Cənubi Qafqazda sülhün möhkəmlənməsinə heç bir töhfə vermək istəmir. Gürcüstan tərəfinin təşəbbüsünü Azərbaycan xalqı olaraq alqışlayırıq. Əslində Gürcüstan Azərbaycanın 2 ildə səsləndirdiyi fikirləri paylaşıb. Azərbaycan Vətən müharibəsi bitdikdən sonra qalib gəlməyinə baxmayaraq, məğlub tərəfə sülh əlimizi uzatdıq. Gürcüstan baş nazirinin təklifi Azərbaycanın Ermənistanla sülh şəraitində münasibətlərinin qurulmasına xidmət edir. Bu günə kimi Ermənistanın atdığı addımlar, təcrübəmiz deməyə imkan verir ki, Ermənistan bu görüşün də nəticələrinin yerinə yetirilməsinə razı olmayacaq.
Hesab edirəm ki, Ermənistana təzyiq etmək gücündə olan dövlətlərin xaricində digər dövlətlərin təşəbbüsləri yalnız alqışlanmalıdır. Amma əldə ola biləcək ciddi nəticələr düşünmək çox çətindir. Ermənistana isə təsir edə biləcək cddi bir neçə qlobal güc mövcuddur. Bunlar Rusiya, Amerika, Fransa, Qərbi Avropa dövlətləri, BMT-dir. Amma nə isğal dövründə, nə Vətən müharibəsindən sonra təzyiq müşahidə etdik. Əksinə, 12 -14 sentyabr tarixli təxribatlardan sonra ABŞ və Fransa rəsmilərinin sərgilədiyi mövqe onu göstərir ki, həmin güclər Ermənistan və Azərbaycan arasında münasibətlərin tənzimlənməsində maraqlı deyillər.Qarant rolunda çıxış etmək istəyən ABŞ-ın prezidenti belə Ermənistana ünvanladığı məktubda "Dağlıq Qarabağ əhalisi" deyə söz işlədib.Bu münqaişənin hələ də həll olunmadığını göstərir. Təəssüf ki, Bayden kimi avantürist, qeyri-dürüst birinin Cənubi Qafqaz reallıqlarını qəbul etməyən davranışları Ermənistan xalqında yalnış təsəvvürlər formalaşdırır. Ermənistana təsir edə biləcək dövlətlər tam obyektiv olmayana qədər Gürcüstanın təşəbbüsü ciddi nəticə əldə olunacağına inam formalaşdırmır".

Şəbnəm Lətifi

Telegramda izləyin