"8 noyabr Zəfər Günümüz mübarək!" - DEPUTAT

"Azərbaycan Respublikasının Prezidenti, müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin 44 günlük Vətən müharibəsində qələbəsi şərəfinə təsis edilmiş Zəfər Günü bu il noyabrın 8-də ilk dəfə qeyd ediləcəkdir. Azərbaycan xalqının və dövlətinin qüdrətinin rəmzinə çevrilmiş bu möhtəşəm Zəfərin tarixi əhəmiyyəti bir əsrin hüdudlarına sığmır. 44 günlük Vətən müharibəsi nəticəsində Azərbaycan torpaqlarının 30 illik işğalına son qoyulması, dövlətimizin ərazi bütövlüyünün təmin edilməsi ilə birlikdə, son iki yüz ilə yaxın dövrdə Azərbaycan xalqına çoxsaylı milli fəlakətlər gətirən erməni şovinizminə və ekspansionizminə sarsıdıcı zərbə endirilmiş və xalqımızın tarixi taleyi ilə bağlı olan son dərəcə mühüm bir məsələ həll edilmişdir.

Azərbaycan Respublikasının Prezidenti cənab İlham Əliyevin Sərəncamı ilə 2023-cü il Azərbaycanda "Heydər Əliyev İli" elan edilib. Heydər Əliyevin yolu keçmiş, indiki və gələcək nəsillər qarşısında öz məsuliyyətini anlayan hər bir azərbaycanlı üçün müstəqilliyin, suverenliyin, inkişafın, tərəqqinin, böyük Zəfərimizin davamlılığının və tarixi ədalətin bərpasına tam nail olmağımızın yeganə qarantıdır".

Bunu Sonxeber.az-a Milli Məclisin deputatı Bəhruz Məhərrəmov deyib.

O bildirib ki, 2023-cü ildə ən böyük təmənnamız Ulu Öndərin ruhuna, adına layiq vətəndaş olmaq, onun milli dövlәtçilik məfkurəsinə sadiqliyi ifadə edən ideyalarını yaşadan İlham Əliyev şəxsiyyəti ətrafında daha sıx birləşərək yekun sülhə, vətəndaş cəmiyyətində daha sarsılmaz birliyə, bölgəmizdə ədalətin və təhlükəsizliyin bərqərar edilməsinə töhfəmizi verməkdir.

"Sərəncamda da ifadə olunduğu kimi, "Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. Bu müqəddəs mirası qoruyub saxlamaq hər bir azərbaycanlının şərəfli vəzifəsidir".
AYSEL QULİYEVA

Telegramda izləyin

instagramda izləyin