Putin nüvəni işə salsa, III Dünya müharibəsi başlayacaq? - REALLIQ, YOXSA MİF?

"Putin düşünmür ki, o, nüvə silahına əl atana qədər onu vurub sıradan çıxaracaqlar. Rusiyanın nüvə təhdidi reallıqları əks etdirmir. Putin təhdiddə israrlıdırsa, görünən odur ki, o, taktiki nüvə silahlarını yox, ballistik nüvə raketlərini işə salmaq istəyir. Amma istənilən halda Putin bu silahları işə salana qədər qabaqlayıcı nüvə zərbəsi ilə onun ölkəsi sıradan çıxarılacaq. Ona görə nüvə təhdidləri indiki zamanda real səslənmir və bu təhdidlər Rusiyanı hədəfə çevirir".

Bu sözləri BiG.AZ-a açıqlamasında siyasi şərhçi Qabil Hüseynli deyib.

Ekspert bildirib ki, Qərb ölkələri, NATO dövlətləri Putinin nüvə təhdidlərini doğru qarşılasalar da, ona cavab verəcək tədbirləri də indidən hazırlayıblar:

"İndi söhbət ondan gedir ki, Putin "nüvə düyməsini" basana qədər artıq onun özünə və ölkəsinə qarşı da önləyici, qabaqlayıcı nüvə zərbələri endiriləcək. Beləliklə, onun dünyaya nüvə silahı ilə hücum etmək imkanları sıfra yaxın olacaq. Bu nöqteyi-nəzərdən, hesab edirəm ki, Putinin nüvə təhdidləri indiki şəraitdə real görünmür, əksinə, Rusiya dövlətçiliyini, Rusiyanın özünü və xalqını ciddi sınaqlara çəkə bilər. İmkan verilməyəcək ki, Putin və onun dövləti nüvə zərbəsi endirsin".

Politoloq Üçncü Dünya müharibəsi proqnozlarına da münasibət bildirib:

"Üçüncü Dünya müharibəsi real görünmür. Söhbət Qərbin Rusiyanın beynəlxalq təhlükəsizlik üçün törətdiyi riskləri önləmək niyyəti ilə Rusiyanın nüvə potensialını da, hərbi potensialını da sıradan çıxara biləcək qabaqlayıcı tədbirlərin görlməsindən gedir. Nüvə silahının böyük ehtiyatları Amerika və Rusiyadadır. Böyük Britaniya, Fransa və Çində də var. NATO dövlətlərinin nüvə potensialının böyük hissəsi elə NATO dövlətlərinə aiddir. Üstəlik, onlar daha modern, yeni texnologiyalarla təchiz edilmiş silahlara malikdirlər. Ona görə də Rusiyanın nüvə müharibəsində başqa ölkələrə qalib gələcəyi haqqında səsləndirdiyi fikirlər, zənnimcə, reallığa uyğun deyil.

Nüvə təhdidi, ilk növbədə, Ukraynaya tuşlanıb. Amma Putinin təhdidlərindən belə görünür ki, o, NATO ölkələrini də (yəni ABŞ və Böyük Britaniyanı da, Avropa ölkələrini də) hədəfə ala bilər. Amma bunun baş tutacağı barədə suala birmənalı "hə" cavabını vermək çətindir".

Telegramda izləyin