"Anamın son sözü "uşaqlar üçün bozbaş bişirməyi unutma" oldu" - CANANA SÜLEYMANLI

Xəbər verdiyimiz kimi, Ruhəngiz Qasımova ilə Təzəpir məscidində vida mərasimi keçirilir. Vida mərasimdə ailə üzvləri ilə yanaşı, bir çox tanınmış şəxslər də iştirak edirlər.

Bəstəkarın qızı Canana Süleymanlı anası barədə Sonxeber.az-a danışıb.

O, anasının son sözlərilə bağlı sualı belə cavablandırıb:

"Anam həmişə Bakıya gəlirdi. Sonra "COVID"ə görə 2 il gələ bilmədi. Sentyabrın 26-da, səhər Bakıya qayıtmalı idik, amma anamın halı pisləşdi. 10 günə anam vəfat etdi. Böyrəklərindəki problemə görə ürəyi dayandı. Mənə son sözü "Uşaqlar üçün bozbaş bişirməyi unutma" oldu".

C. Süleymanlının sözlərinə görə, Ruhəngiz xanım ən çox nəvəsi Mahir haqqında danışardı.

"Bizim ailəmizi yaxından tanıyanlar bilirlər ki, anam atamın ölümündən sonra yaşaya bilmədi. Anam güclü adam olub, o istəsəydi, yaşaya bilərdi. Dəfn ilə bağlı yerin harada olacağına dair ailəmiz qərar verdi. İlk dəfədir ki, kimsə Honkonqdan Bakıya dəfn olunmağa gətirilir. Buna heç kim inanmırdı. Amma çox çətin olsa belə, Bakıya gələ bildik", - deyə bəstəkarın qızı əlavə edib.

Qeyd edək ki, Ruhəngiz Qasımova 82 yaşında Honkonqda vəfat edib. O, Yasamal qəbiristanlığındakı ailə məzarlığında dəfn ediləcək.
AYSEL Yusifqızı

Telegramda izləyin