Radiodalğalar hər zaman əhatəmizdədir - Bəhruz Əliyev

"Kainatın sirrini tapmaq istəyirsinizsə, enerji, tezlik və titrəmə (vibrasiya) dili ilə düşünün" Nikola Tesla deyib. Bənzər digər yanaşmanı Albert Eynşteyn söyləyib: "Maddə dediyimiz şey, titrəmələri hisslərimizin hiss edə biləcəyi səviyyəyə enmiş enerjidir. Heç bir maddə yoxdur."
Tarixə iz qoymuş alimlərin dediyi sözlər bir qədər düşündürücüdür. Ətrafımızda hiss etmədiyimiz və görmədiyimiz radio dalğalar var. Bu radio dalğalar 30 Hz-300 GHz arasında bütün dünyada özünü göstərir. Təbiətdə kontrol edə bilmədiyimiz radio dalğalar da mövcudur. Məsələn: Şimşək, Kosmosdan gələn radio dalğalar və s. İnsanlıq isə bu radio dalğaları 1867-ci ildə kəşf edib, öz yararına istifadə etməyə başlayıb. Sonra isə bu radio dalğaları ilə də mübarizəyə başlayıb.

Bilirsiniz ki, açıq hava məkanlarına, konsertlərə, filmlərdə də şəbəkə məhdudiyyəti ilə qarşılaşırıq. Səbəblərdən biri Jammer adlanan radiodalğaları bloklamaq üçün istifadə olunan cihazdır.

Mövzu ilə bağlı Sonxeber.az-a İT üzrə mühəndis ekspert Bəhruz Əliyev açıqlama verib.

O bildirib ki, bu çoxşaxəli geniş mövzudur.
"Burda məsələdə qısaca 2 məqama aydınlıq vermək olar. Birinci məqam GSM texnologiyasının sektoruna düşən mobil avadanlıq sayının limiti keçməsidir.
İkinci məqam isə, tədbirlərdə və insanların çox toplaşdığı yerlərdə vəya mobil telefonların işlənilməsinin arzu olunmadığı məkanlarda (muzey, kino, teatr, xüsusi tədbirlər, ibadət yerləri və s.) Jammer adlanan siqnal vəya tezlik pozucu cihazların yerləşdirilməsidir. Jammer adlanan tezlik pozucu cihazlar, pozmaq istədikləri siqnal ilə eyni tezlikdə küy(gürültü) istehsal edərək, mobil cihazların normal işləməsinin qarşısını alır. Belə bir misalla daha da aydın izah etmək olar: Tutaq ki, siz planşetinizdə musiqiyə qulaq asırsınız, bu anda yanınızda rok musiqi çalınan böyük bir səs avadanlığı(speaker) qoyulur. Təbii ki, siz planşetdən çıxan musiqini eşitməyəcəksiniz. Jammeri də bir növ bu məntiqdə başa düşmək olar. Amma bu dalğaları insan qulağı eşitmir və insan gözü görmür. Xüsusi avadanlıqlarla müşahidə etmək mümkündür. Jammer(müxtəlif adları var) adlanan bu cihaz GSM (900MHz, 1800MHz) və WIFI dalğa yayınlarını(2.4GHz, 5.0GHz) blok edə bilir və düzgün çalışmasının qarşısını alır. Təhlükəsizlik xidməti də bu üsuldan ehtiyac olduğu halda istifadə edə bilər. Uzaqdan müvafiq dalğalar vasitəsi ilə idarəetməsi olan, təhlükəli avadanlıqların işə salınmasının qarşısını almaq üçün də istifadə edilə bilər".
AYSEL ƏKBƏR

Telegramda izləyin