"Böyük Qayıdış proqramında qarşıya qoyulan məqsədlər layiqli həyat şəraitinin göstəricisidir" - DEPUTAT

"Ötən ilin fevralında "Azərbaycan 2030: sosial-iqtisadi inkişafa dair Milli Prioritetlər" təsdiq edilərkən işğaldan azad olunmuş ərazilərə Böyük Qayıdış 5 milli öncəlikdən biri kimi müəyyən olunmuş, prosesin realizəsi istiqamətində çox ciddi addımların atılmasına başlanmışdı. Cənab Prezidentin təsdiq etdiyi "İşğaldan azad olunmuş ərazilərə Böyük Qayıdışa dair dövlət Proqramı" isə cari milli prioritet üzrə köklü hüquqi bazisdir".

Bunu Sonxeber.az-a Milli Məclisin deputatı Bəhruz Məhərrəmov deyib.

O bildirib ki, eyni zamanda I Dövlət Proqramını qəbul etməklə postmüharibə dövründə işğaldan azad olunmuş ərazilərin əsl sahibi kimi Qarabağ və Şərqi Zəngəzurda əbədi mövcudluğumuzda bizim nə qədər qərarlı olduğumuzu dünyaya göstəririk.

"Həmçinin bu sənəd öz qələbə nitqində Qarabağı, Zəngəzuru dirçəldəcəyimizi bəyan edən Müzəffər Ali Baş Komandanın ərazilərimizin dirçəldilməsi ilə bağlı iradəsinin ifadəsi, əməli təzahürü və prosesin realizəsinin praktiki planıdır.
Kifayət qədər əhatəli olan proqram həm də keçmiş məcburi köçkünlərin konstitusion səviyyədə ali niyyət kimi bəyan edilən hüquqlarının və azadlıqlarının, layiqli həyat səviyyəsinin təmin edilməsi istiqamətində çox ciddi bir yol xəritəsidir. Nəzərə almalıyıq ki, bizim bir milyon civarında soydaşımız 30 ildir vətənindən didərgin salınmaqla təbii hüquqlar başda olmaqla çoxsaylı hüquqlarından məhrum olunmuşdu. Qəbul olunan sənəd yalnız çoxsaylı hüquqların bərpasına yönəlməyib, bu iş həm də Dövlət Proqramının prioritet istiqamətləri kimi sistemli şəkildə təmin ediləcək.
Sənəddə ilk növbədə bütövlükdə Şərqi Zəngəzur və Qarabağın təhlükəsiz bir zonaya çevrilməsi hədəflənir ki, bu həm də ciddi geosiyasi hadisə hesab olunmalıdır. Biz regional təhlükəsizliyə ümummilli məqsəd kimi baxmaqla Ermənistandan, onun təhrikçi havadarlarından fərqimizi ortaya qoyuruq.
Proqramda qarşıya qoyulan digər vacib hədəflər insanlar üçün layiqli həyat şəraitinin təmin olunmasıdır. Bunun üçün müasir yaşayış məntəqələrinin salınması, əhatəli və qabaqcıl standartlara cavab verən infrastrukturun qurulması nəzərdə tutulur ki, artıq istifadəyə verilən Füzuli, Zəngilan Beynəlxalq Hava Limanları, Ağalı kəndi, digər rayonlarımızda başlanan çoxşaxəli işlərin nümunəsində müvafiq istiqamətdə çox ciddi nəticələrimiz var. Eyni zamanda cənab Prezident Proqramda kompleks yanaşaraq əhalinin yalnız öz ata-baba yurdlarına təhlükəsiz layiqli qayıdışını deyil, həm də əhalinin dayanıqlı məskunlaşması məsələsini də hədəf qoyur. Bu hədəfə çatmaq üçün isə ərazilərin iqtisadi inkişafının dəstəklənməsi üçün ciddi proqramların icrası nəzərdə tutulur. Yəni bu kompleks hədəflər planı bölgəyə hayat gətiməklə bərabər, həm də urbisidə, ekosidə məruz qalmış böyük bir ərazini ən müasir, ən sağlam mühitə malik yaşayış məskənlərindən birinə çeviririk. Ən nəhayət, biz quruculuğu, bərpanı təbiətin dostu, yaşıl artım ölkəsi kimi aparırıq. Bildiyiniz kimi, təmiz ətraf mühit və yaşıl artım ölkəsi olmaq bizim yaxın 10 il üzrə Milli Prioritetlərimizdən biridir. Bu mənada Böyük Qayıdışa dair dövlət Proqramında işğaldan azad olunmuş ekoloji təmiz mühitin təmin edilməsi niyyətini bəyan etməsi, elə milli prioritetə doğru inamlı addımdır.
Ümumiyyətlə, Dövlət Proqramı yalnız növbəti 4 il üçün Qarabağ və Şərqi Zəngəzurda planlaşdırılan işlər tikinti və quruculuqla məhdudlaşmır. Nəzərə alaq ki, bu hələ yalnız birinci sənəddir, hədəflər isə daha böyükdür. Bu mənada istisnasız və mübağiləsiz deyə bilərik ki, cənab İlham Əliyevin Qarabağ və Şərqi Zəngəzurun bərpası və bu bölgələrə əhalinin qayıdışına dair vizyonu və hədəfləri milli dövlətçilik konsepsiyamızın ən mühüm sütunlarından birinə çevriləcək".
AYSEL ƏKBƏR

Telegramda izləyin