"Apple"ın əsas uğuru bu reklamdan sonra oldu - VİDEO

Hazırda dünyanın ən sevilən şirkətlərindən olan "Apple" 1 aprel 1976-cı il tarixində Stiv Cobs, Stiv Voznyak və Ronald Veyn tərəfindən "Apple I" kompüter dəstini satmaq məqsədilə qurulub. Hər bir məhsulun uğuru onun düzgün reklamından asılıdır.

BiG.AZ oxuculara bununla bağlı maraqlı məlumatı çatdırmaq istəyir.

Belə ki, yarandığı gündən bu günə uzun, keşməkeşli yol keçib zirvədə qalmağı bacaran "Apple" şirkətinin əsas irəliləyişi 1984-cü ildə "Super Ball" oyunu zamanı nümayiş olunan və ilk "Macintosh"un çıxışını bildirən reklamdan sonra olub. Bu, reklama ibrətamiz, fəlsəfi yanaşmanın nümunəsidir.

Reklam çarxının əsas fikri Corc Oruellin qəmgin, antiutopik "1984" əsəri ilə bağlıdır. Hollivudun məşhur rejissorlarından olan Ridli Skott məhsulun funksionallığından yox, daha çox zövq və həyat tərzindən bəhs edən, gələcək reklam kampaniyalarına örnək olacaq əsl qısametrajlı film çəkib.

Burada Oruel mənzərəsinin fonunda əlində böyük bir çəkic yellədən qız ekrana tərəf qaçır. "Böyük Qardaş" ( həmin dövrdə "Apple"ın ən böyük rəqibi olan "İBM" şirkəti) geniş ekrandan vecsiz proletarlar qarşısında çıxış edir. Qız əlindəki çəkici ekrana tərəf atır. Bu an ekran gurultuyla sınır və fonda məşhur şüar yazılır:

"24 yanvarda "Apple Computer" şirkəti "Macintoch"u təqdim edəcək və siz 1984-cü ilin niyə "1984" kimi olmayacağını görəcəksiniz".

Beləliklə, "Apple" özünü üsyançılara, azadlıq döyüşçülərinə, daha yaxşı gələcək axtarışında olanlara aid edirdi. Sözügedən reklamla şirkət geniş auditoriyaya üz tutaraq, "Apple"ın təkcə kompüter proqramçıları üçün yox, hər kəs üçün nəzərdə tutulan bir məhsul təklif etdiyini bildirmişdi.

Həmin tarixi reklam çarxını təqdim edirik:

Telegramda izləyin