Metroda sıxlığın qarşısını necə almaq olar? - RƏSMİ AÇIQLAMA

"Sərnişinlərin çox olduğu bütün stansiyalarda sıxlıq var. Məsələn "Ulduz" stansiyasında belə bir mexanizm tətbiq olunmur. Amma xüsusilə sıxlıq olanda stansiyalarda səhər və axşam saatlarında eyni qayda ilə nəzarət təmin olunmaq şərtilə, yəni platforma səviyyəsində boşluq varsa, avtomatik bir deyil, bir neçə qapı açıq olar bilər. Amma ifrat dərəcədə yüklənməyə doğru gedirsə, burada bizim özümüzün xüsusi tənzimləmə mexanizmlərimiz var. Bu zaman avtomatik olaraq bir və yaxud iki qapıdan istifadə olunur".

Bu sözləri BiG.AZ-a açıqlamasında "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov deyib.

O bildirib ki, son günlər metronun "Gənclik" və sıxlıq müşahidə olunan digər stansiyalarında yüklənməni aradan qaldırmaq üçün girişdə və keçiddə tənzimləmə mexanizmləri tətbiq olunur:

"Sıxlığın səbəbi, təbii ki, bəllidir. Yəni oradakı tədris günü birinci növbənin dərsləri başa çatdıqdan sonra günorta saatlarında, daha sonra isə axşam saatlarında eyni qayda ilə ikinci növbənin dərsləri, eyni zamanda iş vaxtı başa çatdığı üçün "Gənclik" stansiyasında sıxlıq müşahidə edilir. "Nərimanov" stansiyasında da bu hal yaşanır. Sıxlığın əsas yaranma səbəbi budur.

Bir qapının açıq olması platforma səviyyəsində ifrat dərəcədə yüklənmə olmaması üçündür. Çünki platforma səviyyəsində sərnişinin iki yolu var: qatara minir və qatardan düşür. Yəni sərnişinin başqa hərəkət etmə sahəsi olmadığı üçün bu qayda ilə stansiyaların girişində xüsusi nəzarət təmin olunmaqla platforma səviyyəsinin ifrat dərəcədə yüklənməsinin qarşısını almaq üçün bu qayda ilə tənzimləmə mexanizmi tətbiq olunur. Çünki stansiyaların ölçülərini dəyişmək olmaz. Yaxud bu gün üçün qatarlar arasında interval texniki cəhətdən mümkün olan ən optimal şəkildə təyin olunub. Bundan əlavə, stansiyanın ölçüsünə uyğun olaraq bir qatar beş vaqondan ibarət olur. Yəni burada texniki cəhətdən 6-cı, 7-ci vaqon qoşmaq mümkün deyil. Buna görə də stansiyanın ifrat dərəcədə yüklənməsinə yol verməmək üçün artıq girişdə və keçiddə tənzimləmə mexanizmləri tətbiq olunur".

Metropolitenin sözçüsü sıxlığın aradan qaldırılmasının mümkün variantlarından danışıb:

"Metropolitenin texniki imkanları həddində ən optimal mümkün interval təmin olunub. Yəni gur saatlarda "28 May"-"Həzi Aslanov" arasında 2 dəqiqəlik intervalı təmin etmək olur. Pik saatlarda intervalı bundan aşağı təmin etmək mümkün deyil.

Bunun müxtəlif səbəbləri var. Birinci səbəb odur ki, "28 May" stansiyasında Metropolitenin yaşıl və qırmızı xətləri birləşir. Yəni kəsişmir, birləşir. Məhz sonra üzü "Həzi Aslanov"a qədər faktiki olaraq qatar bir xətt üzrə hərəkət edir. Dünya metro sistemində bu yoxdur, amma bizdə var. Bu səbəbdən "28 May" stansiyasından sonrakı stansiyalarda interval iki dəqiqədən çoxdur. Yəni həmin stansiyalarda ən azından 4 dəqiqə interval var.

Metronun 2011-ci ildə təsdiq olunmuş Konseptual İnkişaf Sxemi var. Həmin sxemə uyğun olaraq, bu gün də metronun prioritet vəzifəsi xətlərin ayrılması layihəsidir. Yəni xətlərin ayrılması layihəsi də yekun nəticə olaraq 9 stansiyanın inşasını nəzərdə tutan bir layihədir. Bu, "Dərnəgül"dən sonra "Koroğlu"ya qədər 3 stansiyanı, "Xətai"dən sonra "Həzi Aslanov"a qədər və ona keçid olacaq şərti adı "Həzi Aslanov 2" olan stansiyası daxil olmaqla 4 stansiyasının inşasını nəzərdə tutur. Xətlər bir-birindən ayrılandan sonra hər xətdə müstəqil qatarların hərəkəti təmin olunur. Belə olduqda minimal intervalı təmin etmək üçün sonuncu stansiyanın arxasından qatarın dönüb qayıtdığı bir yoldan digər yola keçmək üçün xüsusi qurğu olur. Ona keçid kamerası deyilir. Yəni belə bir stansiyanın inşa olunması üçün "İçərişəhər"dən sonra bir, yaxud tövsiyə olunan iki stansiya inşa olunmalıdır. Beləliklə, bu stansiya inşa olunandan sonra interval azala bilər. Məsələn, "Elmlər akademiyası"nda 4 dəqiqədən aşağı interval yoxdur və s.

Bu məsələlərin həlli yalnız həmin dövrdə mümkündür. Burada qatarın sayı, stansiyanın qapısının birinin açıq olub, digərinin açıq olmaması hər hansısa bir rol oynamır. Bu gün qatarların, vaqonların sayı kifayət qədərdir ki, texniki cəhətdən mümkün olan ən minimal interval təmin olunsun".

Telegramda izləyin