"Şuşanın Türk dünyasının mədəniyyət paytaxtı elan edilməsi mədəniyyətlərarası dialoqa öz töhfəsini verəcək" - Aydın Hüseynov

"Şuşa şəhəri Azərbaycanın tarixi-mədəni, ictimai-siyasi həyatının mühüm mərkəzlərindən olub. Uzun illər Qarabağ xanlığının paytaxtı olan və əsas müdafiə qalası missiyasını yerinə yetirən Şuşa daim mədəniyyətimizin çiçəkləndiyi şəhər kimi tanınıb. Sənətkarlığın və incəsənətin müxtəlif sahələrinin inkişafı nəinki Azərbaycanın Qarabağ bölgəsinin, bütövlükdə ölkəmizin tərəqqisində mühüm rol oynayıb, şöhrətinə şöhrət qatıb. Türk dünyasının tərkib hissəsi olan Azərbaycan xalqına məxsus olan milli mədəni irs eyni zamanda ümumilikdə türk mədəni irsinə də daxildir. Şuşa qalası orta əsr türk şəhərsalma mədəniyyətinin xüsusiyyətlərini özündə birləşdirir. Bu baxımdan Azərbaycan mədəniyyətinin paytaxtı olan Şuşa bütövlükdə türk mədəniyyətinin də paytaxtı sayılır. Cənab Prezidentin Sərəncamı ilə "Şuşanın Türk dünyasının mədəniyyət paytaxtı elan edilməsi bu şəhərin bütün türk və islam dünyası üçün zəngin mədəni-tarixi irs, əvəzolunmaz sənət məbədi olmasını təsdiqləyir".

Bunu Sonxeber.az-a danışan Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov bildirib.

Millət vəkili qeyd edib ki, Şuşa təkcə Azərbaycan ədəbiyyat və mədəniyyətinin inkişafına deyil, dünya incəsənətinə misilsiz töhfələr vermiş görkəmli şəxsiyyətləri ilə məşhurdur:

"Əbdürrəhim bəy Haqverdiyev, Əhməd bəy Ağaoğlu, Firudin bəy Köçərli, Xurşudbanı Natəvan, Qasım bəy Zakir, Molla Pənah Vaqif, Nəcəf bəy Vəzirov, Yusif Vəzir Çəmənzəminli kimi şəxsiyyətlərin beşiyidir. Şuşa Şərqin konservatoriyasıdır. Bülbül, Cabbar Qaryağdıoğlu, Fikrət Əmirov, Xan Şuşinski, Mir Mövsün Nəvvab, Rəşid Behbudov, Sadıxcan, Seyid Şuşinski kimi incəsənət xadimini yetişdirmiş sənət məbədidir. Erməni terrorçuları bu zəngin möhtəşəm irsi silmək üşün 30 ilə yaxın mədəni soyqırım aparsa da, Şuşanın qədim tarixi-mədəni irsinin unutdurmaq mümkün olmayıb. 1992-ci ildən 2020-ci ilədək Ermənistanın işğalı altında qalan Şuşa şəhərində tarixi-mədəni abidələr, o cümlədən məscidlər, təhsil müəssisələri, kitabxana və muzeylər dağıdılıb, talan edilsə də, 44 günlük Vətən müharibəsində şanlı Azərbaycan Ordusu tərəfindən Şuşanın düşmən işğalından qurtarılmasından sonra böyük quruculuq, bərpa işləri başlanılıb. Şuşanın öz möhtəşəm tarixi siması özünə qaytarılır. Şuşa zəngin mədəniyyət və tarixi sənət abidəsi kimi Türk və islam dünyasının doğma ünvanına çevrilir".

A.Hüseynov bildirib ki, "Şuşa bu gün yenidən qurulur, mədəni və dini irsi bərpa olunur, öz tarixi siması özünə qayıdır:

"Son 2 ildə burada festival və konsertlərin, sərgilərin keçirilməsi, "Xarı bülbül" festivalı və Vaqif poeziya günlərinin təşkil edilməsi, dünyanın müxtəlif ölkələrin nümayəndə heyətlərinin səfərləri Şuşanın beynəlxalq ictimaiyyət üçün zəngin mədəniyyət simasını nümayiş etdirir. Şuşa öz möhtəşəm tarixi ənənələri və mədəniyyəti ilə yenidən dünya mədəniyyətinə və sənətinə öz zəngin, füsunkar töhfələrini verəcək. 2023-cü ildə Türk dünyasının mədəniyyətinin paytaxtı kimi silsilə tədbirlər ev sahibliyi etməklə Şuşa Türk, İslam mədəniyyətinin xüsusiyyətlərini dünyaya nümayiş etdirəcək, keçmiş və gələcək arasında tarixi körpü olmaqla mədəniyyətlərarası dialoqun inkişaf etdirilməsinə əhəmiyyətli dərəcədə təsir edəcəkdir".

Aysel Yusifqızı

Telegramda izləyin