Xankəndinin deputatı: Vardanyan-Arutunyan cütlüyü Xankəndi sakinlərini faktiki girov saxlayır

"Vardanyan-Arutunyan cütlüyünün rəhbərlik etdiyi quldur dəstəsi Xankəndi sakinlərini faktiki girov saxlayır, terror siyasəti həyata keçirir".

Bunu APA-ya açıqlamasında 122 saylı Xankəndi seçki dairəsinin deputatı Tural Gəncəliyev bildirib.

Tural Gəncəliyev deyib ki, Laçın-Xankəndi yolu açıq olsa da quldur dəstəsi saxta böhran görüntüsü yaratmaq, dünya ictimaiyyətini çaşdırmaq üçün sadə insanların o yoldan istifadə etməsinə imkan vermir: "Bütün bunlar Vardanya-Arutunyan cütlüyünün qanunsuz əməllərini, Azərbaycan xalqına məxsus təbii sərvətlərin qanunsuz talan edilməsini dünya ictimaiyyətindən gizlədilməsi məqsəd daşıyır. Bu quldur dəstəsini maraqlandıran yeganə məsələ də budur. Vardanya-Arutunyan cütlüyü məqsədlərinə nail ola bilməyəcək. Laçın-Xankəndi yolunda Azərbaycan ekofəallarının keçirdiyi etiraz aksiyanın da məqsədi məlumdur. Məqsəd Azərbaycan sərvətlərinin qanunsuz talanmasına son qoyulmasıdır. Vardanya-Arutunyan cütlüyü isə guya aksiyaçıların yolu bağlaması, humanitar yüklərin belə buraxılmadığı barədə yalanlarla dünya ictimaiyyətini çaşdırmağa çalışdılar, ancaq bu da alınmadı. Digər tərəfdən, dinc aksiya iştirakçılarının guya Rusiya sülhməramlıları ilə toqquşması barədə də saxta məlumat yaydılar. Bütün bunların hamısı ifşa olundu".

Deputat qeyd edib ki, hazırda Vardanya-Arutunyan cütlüyü onların qanunsuz əməlləri, terrorçu fəaliyyəti ilə razılaşmayan Xankəndi sakinlərinə təzyiq edir, hətta döydürüb işgəncə verirlər. Xankəndi sakinlərinin sosial şəbəkə hesabları da izlənilir, təftiş edilir: "Bu yaxınlarda bir neçə Xankəndi sakini sosial şəbəkə profillərində Vardanya-Arutunyan cütlüyünü ifşa etdi. Qarabağda yaşayan erməni vətəndaşlarımız onları girovluqda saxlayan Vardanya-Arutunyan cütlüyünün, bu qanunsuz şəbəkənin əməllərini ifşa etməyə davam etməli və bu ünsürlərin Qarabağdan rədd edilməsi üçün Laçın-Xankəndi yolundakı aksiyaçıların səsinə səs verməli, onların yanında olmalıdırlar".

Tural Gəncəliyev bu proseslər fonunda Ermənistan Baş naziri Nikol Paşinyanın qeyri-ciddi davranışlarına da diqqət çəkib: "Ermənistan hakimiyyəti gah problemi Rusiya sülhməramlılarında axtarır, gah Kollektiv Təhlükəsizlik Müqaviləsi Təşkilatını Azərbaycanla üzbəüz qoymaq üçün müxtəlif bəyanatlar verir. Kollektiv Təhlükəsizlik Müqaviləsi Təşkilatının üzvləri Ermənistanın destruktiv əməllərini ifşa etdikdə, iradlarını bildirdikdə isə kənar güclərin regiona cəlb edilməsinə cəhdlər göstərirlər. Hələ Soçidə Paşinyan bildirmişdi ki, Rusiya sülhməramlıları Qarabağda müddətsiz qalmalıdır. İndi isə bildirir ki, Rusiya sülhməramlıları bölgədən çıxmalıdır və beynəlxalq təşkilatlardan ibarət missiya Qarabağa gəlməlidir. Bu, özü də Paşinyanın çarəsizliyini və siyasi səbatsızlığını, ümumiyyətlə Ermənistandakı siyasi-hərbi elitanın konstruktiv düşünmək qabiliyyətini də itirdiyini göstərir".

Deputat vurğulayıb ki, Qarabağda ermənilər yaşayan ərazilər, Laçın-Xankəndi yolu Azərbaycan ərazisi, Azərbaycanın daxili məsələsidir: "Ona görə də Vardanyan-Arutunyan cütlüyü və onların rəhbərlik etdiyi terrorçu ünsürlər Qarabağ bölgəsindən çıxarılmalı, cinayətkarlar Azərbaycan qanunları qarşısında cavab verməlidirlər. Qarabağdakı ermənilər isə Azərbaycan Konstitusiyası, qanunları çərçivəsində yaşaya bilərlər. Mən keçmiş məcburi köçkünlərimizin də Xankəndi, Xocalı, Ağdərə, Xocavənd və digər şəhər və yaşayış məntəqələrinə geri dönəcəyinə günün də yaxında olduğuna əminəm".

Telegramda izləyin