"Xankəndi-Laçın yolunda 36 gündür davam edən aksiya Azərbaycan xalqının mərdliyini bir daha bütün dünyaya göstərdi" - DEPUTAT

Xəbər verdiyimiz kimi Azərbaycanın Qarabağ iqtisadi rayonunda faydalı yataqların qanunsuz istismarı əleyhinə Xankəndi-Laçın yolunda keçirilən etiraz aksiyası otuz altı gündür davam edir.

Bununla bağlı Sonxeber.az-a danışan deputat Cəbi Quliyev bildirib ki, havanın soyuq və şaxtalı olmasına baxmayaraq, Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən etiraz aksiyası otuz altı gündür davam edir:

"Otuz altı gündür ki, aksiya iştirakçıları birlik nümayiş etdirərək dünya ictimaiyyətini ekologiyanı qorumağa çağırırlar. Günlərdir ki, ekofəallar, vətəndaş cəmiyyəti nümayəndələri, QHT təmsilçiləri, tələbələr yüksək əzm, mətanət, qətiyyət nümayiş etdirirlər. Hər dəfə aksiya iştirakçıları tələbləri yerinə yetirilməyənə qədər buradan çəkilməyəcəklərini bildirirlər. Qarlı və şaxtalı hava belə insanlarımızın iradəsini qıra bilmədi. 36 gündür davam edən aksiya Azərbaycan xalqının mərdliyini və sınmaz iradəsini bir daha bütün dünyaya göstərdi. Xalqımızın sınmaz iradəsi və həmrəyliyi 44 günlük Vətən müharibəsində bizə möhtəşəm zəfəri yaşadaraq 30 ilə yaxındır ki, həsrətində olduğumuz torpaqlarımıza qovuşdurdu".

Deputat vurğulayıb ki, bu gün insanlarımız yenidən bir olaraq ermənilərin Qarabağdakı ekoloji terroruna və oradakı təbii sərvətlərimizin talan olunmasına etirazlarını bildirirlər:

"Təəssüf ki, bu gün Rusiya sülhməramlıları Qarabağda ermənilərin ekoloji terroruna göz yumur, hətta dəstək olurlar. Hələ də erməni silahlı birləşmələri Qarabağda qalmaqdadır. 2020-ci ilin 10 noyabrında imzalanan üçtərəfli bəyannaməyə görə bir nəfər də olsa erməni terrorçusu Qarabağda qalmamalı idi. Təbii ki, Rusiya sülhməramlıların bu iki il ərzində erməni terrorçularını torpaqlarımzdan çıxarmaması bizdə onlara olan inamı itirib. Qarabağdan çıxarılmalı olan erməni silahlı birləşmələrinin hələdə orada qalma səbəbi və necə silahlandırılması ilə bağlı suallarımız iki ildir ki, Rusiya sülhməramlıları tərəfindən cavabsız qalıb".

Deputat söyləyib ki, Xankəndi-Laçın yolunda keçirilən etiraz aksiyası bizim tələblərimizin yerinə yetirilməsi ilə sonlanacaq:

"36 gündür ki, dünya Azərbaycan xalqının gücünü və iradəsini görməkdədir. İnanıram ki, 44 günlük Vətən müharibəsindəki möhtəşəm zəfər yenidən yaşanacaq və aksiya bizim tələblərimizin yerinə yetirilməsi ilə bitəcək".

Aysel Yusifqızı

Telegramda izləyin