"Türkiyə tərəfinin istəyi olarsa, Ermənistan münasibətləri normallaşdırmağa hazırdır"-Ermənistan Parlamentinin spikeri

Ermənistan Parlamentinin spikeri Alen Simonyan bildirib ki, Türkiyə tərəfinin istəyi olarsa, Ermənistan hakimiyyəti Türkiyə ilə münasibətləri normallaşdırmağa hazırdır.

Sonxeber.az xəbər verir ki, bu barədə erməni mətbuatı məlumat yayıb.

"Türkiyə tərəfi istəsə, hər zaman səbəblər gətirə bilər. Nemezida heykəli olmasa, başqa bir şey. Şəxsən mən Nemezida heykəlinin ucaldılmasını səhv hesab edirəm, çünki bu, dövlət siyasəti xətti deyil və ola da bilməz, amma yenə deyirəm, bu, Türkiyə üçün sadəcə bir bəhanə idi. Bayaq dedim ki, Türkiyəyə getməmək üçün milyonlarla səbəb tapa bilərdim. Əgər Türkiyədən iradə varsa və məndə belə bir təəssürat yaranıbsa, biz buna hazırıq, hətta böyük tənqiddən də keçməyə, lakin erməni xalqına davamlı sülh gətirməyə hazırıq", - deyə Simonyan bildirib.

O əlavə edib ki, Baş nazir Nikol Paşinyanın prezident Ərdoğanın andiçmə mərasimi üçün Türkiyəyə səfəri çox yaxşı keçdi. Onun sözlərinə görə, Ermənistanın baş naziri diqqət mərkəzində olub.

"Deyə bilərik ki, səfər əsas hadisələrdən biri olub", - deyə spiker Simonyan bildirib.

Qeyd edək ki Ermənistanda Nemezida abidəsinin ucaldılması Türkiyənin etirazına səbəb olmuşdu. Nemezida tanınmayan erməni soyqırımını törədən Osmanlı rəsmilərinə qarşı təşkil olunmuş sui-qəsd hərəkatıdır.

Şəbnəm Lətifi

Telegramda izləyin