Netanyahu: "Rusiyada baş verənlər ölkənin daxili işidir"

"Rusiyada baş verənlər ölkənin daxili işidir".

Bu barədə İsrailin baş naziri Benyamin Netanyahu operativ müşavirədə bildirib.

"İsrailin bununla heç bir əlaqəsi yoxdur, lakin hadisələri diqqətlə izləməyə davam edəcək", - Netanyahu deyib.

Operativ müşavirədə İsrailin müdafiə naziri Yoav Qalant, ordu və kəşfiyyat orqanlarının rəhbərləri, xarici işlər naziri Eli Koen, repatriasiya və inteqrasiya naziri Ofir Sofer və bəzi digər yüksək vəzifəli rəsmilər iştirak ediblər.

Xatırladaq ki, "Vaqner" Xüsusi Hərbi Şirkətinin başçısı Yevgeni Priqojin Rusiya hərbçilərinin "Vaqner" muzdlu hərbi təşkilatının arxa düşərgələrinə raket zərbələri endirdiyini, bir çox döyüşçünün öldüyünü açıqlayıb: "Bu vəhşiliyə necə cavab verəcəyimizə qərar verəcəyik. Növbəti addım bizimdir".

Bundan sonra Rusiya Federal Təhlükəsizlik Xidməti Yevgeni Priqojinə qarşı silahlı üsyana təhrik faktı üzrə cinayət işi açıb. Rusiya Federasiyasının Baş Prokurorluğu bildirib ki, Priqojinin əməllərinə lazımi hüquqi qiymət veriləcək. Müdafiə Nazirliyi isə "Vaqner"in arxa düşərgələrinə zərbə endirilməsi ilə bağlı iddiaları yalan məlumat adlandırıb. Nazirlik eyni zamanda "Vaqner" döyüşçülərinə müraciət edib, silahı yerə qoymağa çağırıb.

Rusiya Prezidenti Vladimir Putin xalqa müraciətində mövcud hadisələri xəyanət kimi qiymətləndirib. O deyib ki, bütün zəruri tədbirlər görüləcək.

Daha sonra Belarus Prezidenti Aleksandr Lukaşenkonun Priqojinlə danışıqlar apardığı barədə məlumat yayılıb. "Vaqner" Xüsusi Hərbi Şirkətin başçısı Yevgeni Priqojin Belarus Prezidenti Aleksandr Lukaşenkonun hərbi hərəkətləri dayandırmaq və gərginliyi azaltmaqla bağlı təklifini qəbul edib.

Telegramda izləyin