İran və Sudan xarici işlər nazirləri son 7 ildə ilk dəfə Bakıda görüşdülər

İranın xarici işlər naziri Hüseyn Əmir Abdullahiyan və Sudan xarici işlər nazirinin müavini Əli əs-Sadiq Qoşulmama Hərəkatının Koordinasiya Bürosunun Nazirlər Toplantısında iştirak etmək üçün Bakıda görüşüblər.

Sonxeber.az xəbər verir ki, İran və Sudan xarici işlər nazirləri son 7 ildə ilk dəfə Bakı Konqres Mərkəzində görüşüblər.

Nazirlər iki ölkə arasında siyasi və iqtisadi əlaqələrin yaxşılaşdırılması və anlaşılmazlıqların aradan qaldırılması çərçivəsində fikir mübadiləsi aparıblar.

Sözügedən təmas 7 ildən sonra iki ölkə arasında bu səviyyədə ilk diplomatik təmas hesab edilir.

2016-cı ildə Səudiyyə Ərəbistanında şiə din xadimi Nimr ən-Nimr də daxil olmaqla 47 nəfəri "terrorçuluq" ittihamı ilə edam etməsi İranda böyük əks-səda doğurmuşdu. Ölkədə etiraz aksiyaları keçirilib, Səudiyyə Ərəbistanının Tehrandakı səfirliyi və Məşhəddəki konsulluq binasına hücumlar təşkil edilib.

Bunun üzərinə Səudiyyə Ərəbistanı, Bəhreyn və Sudan İranla diplomatik əlaqələrini kəsib, Birləşmiş Ərəb Əmirlikləri isə münasibətlərini müvəqqəti işlər vəkili səviyyəsinə endirib. Küveyt səfirini geri çağıraraq İrana qarşı diplomatik hücuma keçən 5-ci ölkə oldu.

Səudiyyə Ərəbistanı ilə İranın mart ayında Çinin vasitəçiliyi ilə diplomatik münasibətləri bərpa etmək barədə razılığa gəlməsindən sonra İranla bölgədəki ərəb ölkələri arasında buzlar əriməyə başlayıb.

Telegramda izləyin