"Mərkəzi küçə hər gün tıxac olur, alternativ ərazi isə icarəyə verilib"

Bakının Suraxanı rayonu, Binə qəsəbəsində ("Südçülük savxozu" deyilən ərazi) 2015-ci ildə avtomobil yolu boş torpaq sahəsinə birləşdirilərək "European Tobacco-Baku" ASC-yə icarəyə verilib. 200 minə yaxın sakinin yaşadığı qəsəbədən şəhər mərkəzinə getmək üçün yalnız bir mərkəzi yol qalıb ki, orada da yüklənmə səbəbindən hər gün böyük tıxac yaşanır.

"Qafqazinfo" xəbər verir ki, bu barədə qəsəbə sakinləri şikayət ediblər.

Problemlə bağlı 600 sakinin imzası ilə rəsmi qurumlara müraciət ünvanlanıb. Sakinlər iddia edirlər ki, yol ərazisi Suraxanı rayonuna aid olsa da, həmin yolu icarəyə Abşeron Rayon İcra Hakimiyyəti verib. Qeyd olunur ki, Prezidentin fərmanı ilə Abşeron rayonunun 10 min hektar torpaq sahəsi Bakı Şəhər İcra Hakimiyyətinin idarəetməsinə verilib. Ötən dövr ərzində bir çox yerlərdə, o cümlədən Abşeronun bir neçə təsərrüfatında islahatlar aparılıb. İslahat gedən təsərrüfatların torpaqları xüsusi mülkiyyətə ayrılıb və bələdiyyəyə verilib. Amma iş yarımçıq qalıb və bu səbəbdən Abşeron rayonu digər rayonların ərazisində torpaq sahələrini istədiyi kimi istifadə edir.

Şikayətçilərin söylədiklərinə görə, sözügedən yolun açılması Binə qəsəbəsində yaşayan sakinlər üçün alternativ giriş-çıxış yolu kimi çox vacibdir. Mərkəzi küçə hər gün tıxac olur və tıxac Mərdəkan şosesinə kimi uzanır. Sakinlər dəfələrlə aidiyyəti orqanlara müraciət etsələr də, heç bir tədbir görülmədiyini bildiriblər.

Sözügedən yol hansı dövlət qurumunun balansındadır? Başqa icra hakimiyyətinin ərazisi Abşeron RİH tərəfindən necə icarəyə verilib? Sakinlərin problemlərinin aradan qaldırılması üçün hansı iş görülür?

Bu suallarla müvafiq icra hakimiyyətləri və Agentliklərə müraciət etdik. Azərbaycan Avtomobil Yolları Dövlət Agentliyindən həmin yolun Agentliyin balansında olmadığını bildirdilər.

Abşeron RİH başçısının müavini Gülnar Rəhimovadan isə sorğumuza belə cavab aldıq: "1963-cü ildə Abşeron Rayonu təşkil olunan zaman Bakı şəhərinin inzibati ərazisində yerləşməklə kənd təsərrüfatı məhsullarının yetişdirilməsinə yararlı olan torpaq sahələri Abşeron rayonunun savxozlarına təhkim edilib, savxozlar islahata getdikdən sonra həmin torpaq sahələri Rayon İcra Hakimiyyətinin sərəncamında saxlanılıb və ötən müddərt ərzində də kənd təsərrüfatı məhsullarının istehsalı məqsədilə hüquqi və fiziki şəxslərin icarəsinə verilib.

Prezidentin 13 iyun 2008-ci il tarixli 2866 nömrəli sərəncamı ilə Bakı şəhərinin inzibati ərazisindən Abşerin RİH-nin istifadəsinə verilmiş cəmi 25983,31 hektar torpaq sahəsindən 9954,75 hektarı Bakı Şəhər İcra Hakimiyyətinin idarəçiliyinə qaytarılıb.

Hazırda həmin torpaqlardan 16028,56 hektarı hələ də Abşeron RİH-nin istifadəsindədir və həmin torpaq sahələri kənd təsərrüfatı təyinatlı torpaq sahələri olduğundan sözügedən ərazilərdə yaşayış evlərinin inşası və məskunlaşma qanunla qadağandır".

Telegramda izləyin