"Fransa erməni lobbisinin əlində alətə çevrilib" - Cavid Osmanov

"Fransa Azərbaycana qarşı qarayaxma kompaniyası aparmaqla Ermənistana dəstəyini açıq şəkildə davam etdirməkdədir".

Bu sözləri Milli Məclisin deputatı Cavid Osmanov Sonxeber.az-a bildirib.

Deputat qeyd edib ki, Fransanın bugünki hakimiyyəti erməni lobbisi əlində alətə çevrilib:

"Birincisi, onu qeyd etmək lazımdır ki, Fransa Vətən müharibəsindən əvvəl də Ermənistana dəstəyini nümayiş etdirirdi və çalışırdı ki, elə o zaman danışıqlar prosesini uzatmaqla heç bir nəticə əldə olunmasın və beləliklə Ermənistan Azərbaycan torpaqlarını işğal altında daimi saxlasın. Vətən müharibəsində Müzəffər Ali Baş Komandan Prezident cənab İlham Əliyevin rəhbərliyi ilə Azərbaycan silahlı qüvvələri 44 günə torpaqlarımızı azad etdi və öz tarixinin ən parlaq qələbəsini qazandı. Həmin zaman da Fransa açıq şəkildə Azərbaycana qarşı qərəzli siyasət yürüdürdü. Bir neçə dəfə Azərbaycana qarşı qərəzli qətnamə hazırlamağa cəhd göstərdi. Amma bütün bunlar Azərbaycanın siyasi iradəsini sındıra bilmədi. Tam əksinə, Azərbaycan öz qətiyyətli mövqeyini davam etdirdi və Ermənistan silahlı qüvvələrini darmadağın etdi. O cümlədən, Ermənistanın havadarlarına da ciddi mesaj oldu. 44 günlük Vətən müharibəsindən sonra Fransa Senatının Azərbaycana qarşı qərəzli qətnaməni qəbul etməsi, daha sonra Azərbaycan- Ermənistan münasibətlərinin normallaşması istiqamətində danışıqlar prosesinə maneələr törətməsi və son dövrlər Fransa Senat üzvlərinin, Xarici İşlər Naziriliyi əməkdaşlarının Ermənistana səfər etməsi və Azərbaycana qarşı qərəzli mövqe nümayiş etdirməsi, Azərbaycana qarşı informasiya müharibəsində yaxından iştirak etməsi onu göstərir ki, Fransanın bugünki hakimiyyəti erməni lobbisi əlində alətə çevrilib. Son zamanlar Azərbaycanın qətiyyətli siyasətinin nəticəsi olaraq Laçında nəzarət-buraxılış məntəqəsi qurulduqdan sonra onlar növbəti təxribatlara əl atırdılar. Guya Xankəndi və ətraf rayonlarda erməni əsilli sakinlər blokada şəraitində qalıblar, orada humanitar böhran var. Bütün bunlar Fransanın qərəzindən xəbər verirdi. Eyni zamanda növbəti təxribat törədərək Laçın buraxılış məntəqəsi vasitəsilə Ermənistandan Xankəndiyə humanitar yardım tırlarının keçirilməsinə çalışdılar, amma bütün bunların qarşısı alındı. Dünən də gördük ki, Fransa Xarici İşlər Nazirliyinin sözçüsü növbəti dəfə Xankəndi ətrafında şou yaratmış və Azərbaycan silahlı qüvvələrinin cəmləşdiyini qeyd etdi. Guya ki, Azərbaycan hücuma hazırlaşır. Əksinə, Ermənistan hücuma hazırlaşır və təxribatlara davam edir. Bütün bunlar göstərir ki, Fransa erməni lobbisinin əlində alətə çevrilib. O, Cənubi Qafqazda mövcudluğunu həyata keçirmək niyyətindədir. Fransa anlamalıdır ki,Azərbaycanla hər hansı təzyiq dilində danışmaq mümkün deyil . Bu gün Azərbaycan Prezident cənab İlham Əliyevin rəhbərliyi ilə çox güclü ölkəyə çevrilib, dünyada ən tanınıb-seçilən,nüfuzlu, hörmətli ölkəyə çevrilib. Azərbaycan bütün addımlarını beynəlxalq hüququn norma və prinsiplərinə uyğun atır və müstəqil siyasət yürüdür. Hər hansı ölkə, qüvvə Azərbaycana diqtə etmək niyyətinə düşsə, onun cavabı layiqincə veriləcək. Azərbaycan haqlı yolunu davam etdirəcək. Heç bir qüvvə, o cümlədən, Fransa Azərbaycanı öz qətiyyətli yolundan çəkindirə bilməz. Azərbaycan ərazisində ancaq Azərbaycan qanunları işləyəcək . Azərbaycan dövləti tərəfindən bundan sonra da müstəqil siyasət yürüdüləcək".

Telegramda izləyin