Şuşa şəhərinin işğaldan azad edilməsindən üç il keçir - VİDEO

Bu gün Şuşa şəhərinin Ermənistanın işğalından azad edilməsindən üç il keçir.

Sonxeber.az xatırladır ki, Prezident, Silahlı Qüvvələrin Ali Baş Komandanı İlham Əliyev 2020-ci ilin noyabrın 8-də Şəhidlər xiyabanından xalqa müraciət edib.

Prezident müraciətində Şuşa şəhərinin azad olunduğunu elan edib.

Şuşa şəhərinin azad edilməsi əməliyyatı Azərbaycanın ordu birliklərinin koordinasiyalı işi sayəsində peşəkar şəkildə həyata keçirilib.

Ordu bölmələrinin bir hissəsi Daşaltı istiqamətində cəmləşdiyi zamanda Azərbaycan xüsusi təyinatlı qüvvələri çətin yollardan keçərək, qayaları dırmaşaraq Şuşa şəhərinə daxil olublar. Şuşadakı döyüşlərdə erməni hərbçiləri məhv ediliblər və şəhərə Azərbaycan bayrağı sancılıb.

Şuşanın azad olunması əməliyyatı hərbi institutların araşdırdığı mövzulardandır.

Xatırladaq ki, Şuşa 1992-ci il mayın 8-də Ermənistan ordusu tərəfindən işğal olunmuşdu.

Bu gün isə Şuşa yerli və beynəlxalq səviyyəli müxtəlif tədbirlərə ev sahibliyi edir.

Azərbaycan Prezidenti İlham Əliyevlə Türkiyə Prezidenti Rəcəb Tayyib Ərdoğan 2021-ci ilin 15 iyununda iki ölkə arasındakı strateji müttəfiqlik əlaqələrini özündə ehtiva edən sənədi Şuşada imzalayıblar. Bu, dünyaya mühüm mesaj idi.

Bildirək ki, həmin sənəd Şuşa Bəyannaməsi adlanır.

Telegramda izləyin