Şəhid ailələrinə verilən 11 min manat ARTIRILSIN: "Hökumətin buna imkanı var"

Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçulara müəyyənləşdirilmiş qaydada 11 min manat məbləğində birdəfəlik ödəmə verilir. Birdəfəlik ödəmə hərbi qulluqçuların Azərbaycan Respublikasının Mülki Məcəlləsinə uyğun olaraq müəyyən edilən vərəsələrinə Əmək və Əhalinin Sosial Müdafiəsi Nazirliyi tərəfindən veriləcək.

Birdəfəlik ödəmə həqiqi hərbi xidmətdə (toplanışda) olduğu zaman həlak olması, ölməsi və ya xəbərsiz itkin düşdüyünə görə ölmüş elan edilməsi ilə əlaqədar əvvəllər sığorta ödənişi verilməmiş, o cümlədən barəsində sığorta ödənişinin verilməsinə dair qanuni qüvvəyə minmiş məhkəmə aktı olmayan hərbi qulluqçuların vərəsələrinə verilir. Bəs bu məbləğ artırıla bilərmi?

Məsələ ilə bağlı Sonxeber.az-a iqtisadçı Xalid Kərimli açıqlama verib.

İqtisadçı bu məbləğin artırılmasını məqsədəuyğun olduğunu bildirib:

"Şəhid ailələrinə ödənilən 11 min manat təbii ki,artırıla bilər. Bu məbləği artırmağa hökumətin imkanı da var. Bu çox həssas məsələdir. Şəhidlərin sayı da bəllidir.
Artırılan məbləğ əvvəl şəhid olan şəxslərin ailələrinə də ödənilməlidir. İkinci Qarabağ müharibəsində iştirak edib, şəhid olan əsgərlərimizin ailələrinə də verilməlidir. Hökumətin buna imkanı da var. Artırılması isə məqsədəuyğundur".

Gülcahan Məmmədova

Telegramda izləyin