Qızı bullinqə məruz qoyan yeniyetmənin bibisi məktəb direktoru OLUB – TƏFƏRRÜAT

Xəbər verildiyi kimi, Şüvəlan qəsəbəsində yerləşən 156 saylı məktəbinin yaxınlığında şagirdlərdən biri həmcinsi tərəfindən bulinqə məruz qalıb.

Məktəbin X sinif şagirdi Dilarə Rza qızı Rzaquliyeva məktəb yoldaşına qarşı etdiyi qısnayıcı hərəkətlərini videoya çəkdirərək sosial şəbəkədə paylaşıb.

Görüntülərdən görünür ki, Dilarə Rzaquliyeva məktəb yoldaşının alnına ədəbsiz söz yazır, onun başında yumurta qırır və saçlarını qayçı ilə kəsir.

Hadisə hüquq mühafizə orqanları və Elm və Təhsil Nazirliyi tərəfindən nəzarətə götürülüb. Məlum olub ki, görüntülərdə əks olunan yeniyetmələrdən yalnız biri – Dilarə Rzaquliyeva, yəni zorakılığı törədən 156 nömrəli məktəbin X sinif şagirdidir. Qısnamaya məruz qalan yeniyetmə isə 9-cu sinif məzunudur.

Elm və Təhsil Nazirliyi yanında İctimai Şuranın sədri Günel Səfərovanın bildirdiyinə görə zorakılığa məruz qalan qız Dilarə Rzaquliyevanın fotosunu sosial şəbəkədə paylaşaraq, altından qeyri-etik ifadələr yazıb. Bundan hiddətlənən Dilarə sözügedən davranışa əl atıb.

Bizim.Media məsələ ilə bağlı bəzi təfərrüatları da öyrənib. Məlum olub ki, zorakılığı törədən Dilarə Rzaquliyevanın bibisi Gülxanım Məmmədova sözügedən - 156 nömrəli məktəbin keçmiş direktoru olub.

Hazırda da həmin məktəbdə direktorun təsərrüfat işləri üzrə müavini vəzifəsində çalışır. O, qardaşı qızının törətdiyi davranışdan şok keçirdiyini dilə gətirərək, hadisənin məktəb daxilində baş verməməsinə bir növ haqq qazandırıb.

Qeyd edək ki, Daxili İşlər Nazirliyinin (DİN) Mətbuat xidmətinin rəisi Elşad Hacıyev məsələ ilə bağlı bildirib ki, əməldə xuliqanlıq cinayətinin tərkib əlamətləri olduğuna görə fakt üzrə cinayət işi açılıb. İstintaq hərəkətləri davam etdirilir. Həmçinin Ailə, Qadın və Uşaq Problemləri üzrə Dövlət Komitəsi, eləcə də Ombudsman məktəblilərin qeyri-etik görüntüləri ilə bağlı məsələni nəzarətə götürüb.

Telegramda izləyin