Hərbi qulluqçuların övladları təhsil haqqından AZAD EDİLƏ BİLƏR? - AÇIQLAMA

Vətəndaşların həyat səviyyəsinin yaxşılaşdırılması dövlətin diqqət mərkəzindədir. Müharibə əlilləri, veteranlar və şəhid ailələrinə göstərilən qayğı da xüsusi olaraq qeyd olunmalıdır. Məlum olduğu kimi, 44 günlük müharibə zamanı şəhid və əlil olmuş hərbi qulluqçuların övladları təhsil haqları dövlət tərəfindən qarşılanır. Yəni bu kateqoriyaya aid olan uşaq pulsuz təhsil ala bilər. Bəs Azərbaycanda hərbi qulluqçuların övladları təhsil haqqında azad oluna bilər?

Mövzu ilə bağlı təhsil məsələləri üzrə ekspert Kamran Əsədov Sonxeber.az-a açıqlamasında deyib ki, hal-hazırda Azərbaycanın 51 təhsil müəssisəsinin bakalavr magistr pilləsində 100 minə yaxın ödənişli əsaslarla təhsil alanlar var:

"Ölkə prezidenti cənab İlham Əliyevin 2019-cu ildə imzaladığı qərara əsasən ali təhsil müəssisələrinin olan yeri 45 faizi 2020-ci ildən sonra isə 50 faizə qədəri pulsuz yerlərdir. Müəyyən kateqoriyaya aid olan insanlar var ki, onlar ödənişli əsaslarla qəbul olsalar da, ölkə prezidentinin müvafiq sərəncamları ilə təhsil haqqından azaddırlar. Azərbaycanın ərazi bütövlüyü uğurunda gedən döyüşlərdə şəhid, əlil olmuş şəxslərin övladları, birinci və ikinci qrup əlil olan valideynlərin uşaqlarının təhsil haqqından azad olması var. 44 günlük müharibədən sonra ölkə başçısı müvafiq bir sərəncam imzaladı. Qazilər və veteranların özləri təhsil haqqından azad oldular".

Ekspertin sözlərinə görə, digər hərbçi övladlarının təhsil haqqından azad olunması ilə bağlı bir müzakirə yoxdur:

"Kimlər ki, Azərbaycanın ərazi bütövlüyü uğrunda gedən döyüşlərdə əlil olub yaxud şəhid ailəsidirsə onlar təhsil haqqından azad oluna bilər. Hərbçilər isə vəzifə öhdəliklərini yerinə yetirirlər. Kifayət qədər Azərbaycanda ödənişli əsaslarla oxuyan var ki, onların sayı 29 min nəfərdir. 29 min nəfər bilavasitə ödənişli əsaslarla oxumaqlarına baxmayaraq, onlarda güzəştli kateqoriyalara aid edilirlər. Onların təhsil haqları dövlət büdcəsinin vəsaiti hesabına ödənilir. Yəni biz bu gün rahatlıqla deyə bilərik ki, Azərbaycanda orta məktəbin tamamilə pulsuz olduğu kimi, ali təhsilində ən azı 70 faizə qədər ödənişsizdir. Bu gün Azərbaycanda təhsilin əlçatanlığı təmin olunub. Əhatə dairəsini isə bilavasitə genişləndirib. Amma hər hansı bir statusa malik olmayan hərbçi ailələrinin övladlarına güzəşt nəzərdə tutulmur".

Kamran Əsədov qeyd edib ki, onlar digər sahədə çalışan şəxslər kimi peşə vəzifəsini yerinə yetirir: "Amma peşə vəzifəsini yerinə yetirən zaman xüsusi xəsarət alıb yaxud statusa malik olurlarsa, o zaman güzəştlər tətbiq oluna bilər. Belə halda isə hər hansı güzəşt nəzərdə tutulmur".

Sevda Səfərova

Telegramda izləyin