Azərbaycan və Ermənistan sərhədlərin delimitasiyasına hansı ərazidən başlayacaq? - AÇIQLAMA

Xəbər verdiyimiz kimi, Ermənistan baş naziri Nikol Paşinyan sərhədlərin delimitasiya və demarkasiyası prosesinə Tavuşdan başlanmasını təklif edib. Eyni zamanda o, deyib ki, sülh müqaviləsi bağlanarsa, Ermənistan və Azərbaycanın bir-birinə qarşı beynəlxalq iddialarından qarşılıqlı şəkildə imtina etmək imkanı nəzərdən keçirilə bilər. Bəs Azərbaycan tərəfi Paşinyanın təklifinə cavab olaraq delimitasiya prosesinə başqa bir ərazidən başlamaq istəyə bilər? Eyni zamanda Qazaxın 7 kəndi və Kərkinin qaytarılması məsələsi bu prosesə daxil ediləcək?

Mövzu ilə bağlı politoloq Turan Rzayev Sonxeber.az-a açıqlamasında bildirib ki, sərhəd komissiyalarının iclası bir müddətdir keçirilir. Bazar günüdə bir görüş təşkil edildi:

"Sərhədlərin delimitasiya və demarkasiyasının haradan başlanması indiki məqamda o qədər əhəmiyyət kəsb etmir. Burada əsas məsələ prosesin başlanması və real işlərin görülməsidir. Komissiyaların görüşünü ümumi mənada müsbət adlandırmaq olar. Prosesə geniş baxdıqda 30 ilin ərzində bunların şahidi olmamışıq. Bu 30 il sonra ən real görülən işlərdir. Bu mənada pozitiv danışmağa dəyər. Paşinyan təklif edir ki, sərhədlərin delimitasiyası Tavuşdan başlansın. Açığı mübahisə ərazilər həmin bölgədə də var. Yəni prinsip etibarilə başlana bilər. Azərbaycan tərəfi Ermənistanın bu təklifini qəbul edib, delimitasiya işləri bitdikdən sonra fərqli bir istiqamətdə delimitasiyanın başlanmasını təklif edə bilər. Bütün bunlar qarşılıqlı razılaşmalar əsasında baş verən məsələlərdir".

Politoloq Qazaxın 7 kəndi və Kərkinin qaytarılması məsələsinə aydınlıq gətirib:

"Ümumiyyətlə bu məsələ iki ölkə arasında dövlət başçılarının yaxud nazirlər səviyyəsi, qeyri-rəsmi formatda danışıqlar ilə müəyyən edilə bilər. Dünya praktikasında anklav və eksklavlar ilə bağlı bir neçə yanaşma var. Bu yanaşmalardan biri qarşılıqlı ərazi mübadiləsi yaxud anklav və eksklavlardan qarşılıqlı şəkildə imtina edilməsi kimi məsələlərdir. Hər iki tərəf bu kimi təkliflər verməsə də, ən azı sözügedən istiqamətdə danışıqlar gedir. Azərbaycan tərəfi həmin kəndləri istədiyini bəyan edib. Hesab edirəm bu məsələlərin həlli tədricən zamanla yerini tapacaq. Bütün hallarda rəsmi görüşlərdə bu məsələ danışılır. Hazırda ortaq bir konsepsiya əldə edilməyib. Amma edilməyəcəyinə dair radikal açıqlamalar yoxdur. Bu baxımdan danışıqlar prosesində həmin məsələlərin həll olunacağına inanıram".

Sevda Səfərova

Telegramda izləyin