Azərbaycanda xarici nömrələrin satışı necə həyata keçirilir? - AÇIQLAMA

Sosial şəbəkə seqmentində, elan saytarında satışlara diqqət yetirsək müvafiq qiymətə satılan xarici nömrələr ilə qarşılaşmamış olmarıq. Ölkədə xarici nömrələrdən istifadə halları az deyil. Bu virtual nömrələr hər nə qədər cəlb etsə də, bir sıra məqsədlər üçün istifadə olunur. Bu nömrələrdən isə daha çox şantaj etmək və fərdi məlumatları ələ keçirmək üçün istifadə edilir. Xarici nömrələrin satışı necə həyata keçirilir və bu nömrələr ilə bağlı hansı addımlar atılmalıdır?

Mövzu ilə bağlı informasiya Texnologiyaları üzrə mühəndis-tədqiqatçı, Azərbaycan Kibertəhlükəsizlik Təşkilatları Assosiasiyasının (AKTA) eksperti Bəhruz Əliyev Sonxeber.az-a açıqlamasında bildirib ki, bu formada olan virtual xarici nömrələrin satışı ölkəmizdə fiziki olaraq həyata keçirilmir:
"Sadəcə sosial şəbəkələr vasitəsi ilə dələduzlar tərəfindən təqdim olunur. Fikrimcə bu tipli dələduzlar ölkə xaricində oturaraq, sosial şəbəkələr üzərindən bu tipli fəaliyyət göstərirlər. Sosial şəbəkələrdə ödəmə terminalları vasitəsi ilə kimlərinsə kart hesablarına pul köçürdüb, çekin şəklini həmin adama hansısa üsulla göndərərək, xarici virtual nömrə alanlar müşahidə olunur. Bu tipli ölkədə yaşayıb, amma xarici nömrə alanların və satanların niyyətləri əsasən sual doğurur. Bu tipli virtual nömrələrin real sim kartı yoxdur. Əsasən müxtəlif məqsədlərlə saxta sosial hesablar açmaq istəyənlər bu yola əl atır. Bir dəfəyə məxsus olaraq, SMS təsdiqlə, virtual nömrə əsasında sosial şəbəkə hesabı aktivləşdirilir və müxtəlif kirli məqsədlər üçün istifadə olunur. Ona görə də məlumatlı olmaq, özümüzü tələlərdən qorumağa çalışmaq və bunun üçün, daim maariflənmək lazımdır. Təbii ki, bu tipli fəaliyyət qanunsuzdur".

Ekspertin sözlərinə görə, qanunda xüsusi hal nəzərdə tutulmadığı halda, vergiyə cəlb olunmadan həyata keçirilən hər növ mal və xidmət satışı qanunsuz sayılır:

"Ölkə xaricindən bu tipli fəaliyyət göstərən dələduzlarla mübarizə çətindir. Ona görə də hər birimiz fərd olaraq, bu tipli səhifələri şikayət etməliyik. Çünkü bir gün bizə bu tipli saxta virtual sosial şəbəkə hesablarından gələn link, fayl və zənglər bizim təhlükəsizliyimizi risk altında qoya bilər. Hazırda dünya texnologiya əsrini yaşayır. İnformasiya texnologiyaları avadanlıqlarının sayısının get-gedə artmasını nəzərə alaraq, çox diqqətli olmalıyıq. Əsasən gələn SMS-lər, zənglər və linklər yad mənbələrdən gəlirsə, təhlükəsizliyimiz sual altındadır deməkdir. Telefonların əməliyyat sistemi avtomatik olaraq, yad mənbədən gələn bildirişləri doğrulamaq üçün, xəbərdarlıq edir. Bir çox əməliyyat sistemi və platformalar məsələyə eyni məntiqlə, amma fərqli üsullarla yanaşır. Hamısında eyni məzmunlu "şikayət et-blokla" funksiyası mövcuddur. Gələn linklərdə şirnikləndirici təkliflərlə varsa, bu daha qorxuludur. Bu kimi halların baş verməməsi üçün, linkin mənbəyi daim yoxlanılmalıdır". Çətinlik olduğu halda sahə üzrə mütəxəssislərin köməyinə müraciət etmək tövsiyyə olunur".

Sevda Səfərova

Telegramda izləyin