"Bəzi dövlətlər Ermənistanı silahlandıraraq regionda məqsədyönlü və planlı şəkildə gərginlik yaratmağa çalışırlar" - DEPUTAT

"Sərhəddə törədilən təxribatlar Azərbaycan-Ermənistan arasında sülh prosesinə ciddi zərbədir".

Bunu Sonxeber.az-a danışan deputat Cavanşir Paşazadə bildirib.

"Bu gün Ermənistan Azərbaycandan fərqli olaraq 2020-ci il noyabrın 10-da imzalanan üçtərəfli Bəyannamənin bəndlərinə uyğun olaraq, öz üzərinə düşən öhdəlikləri yerinə yetirmir. Ermənistanın sərhəddə təxribatlara əl atmasının əsas məqsədi sülh sazişindən imtinadır. Sülh müqaviləsindən imtina Ermənistan dövlət kimi varlığını şübhə atına sala bilər. Törədilən təxribatların Ermənistandakı Avropa İttifaqı Missiyasının müşahidə həyata keçirdiyi ərazidən baş verməsi bizdə müəyyən sualların yaranmasına səbəb olur. Cənubi Qafqazda dayanıqlı sülhün və əmin-amanlığın bərqərar olması Ermənistanın sülh sazişinin imzalaması vacibdir. Təəssüf ki, rəsmi İrəvan 30 il ərzində olduğu kimi bu gün də sülh prosesin bloklanmasına cəhd göstərir. Nikol Paşinyanın açıqlamaları və atdığı addımlar sülh prosesinin arxa plana keçirildiyindən xəbər verir. Son günlər sərhəddə baş verən təxribatlar bunu bir daha sübut edir".

Deputat qeyd edib ki, Ermənistan qeyd-şərtsiz sülh müqaviləsini imzalamalı, Qazaxın 7 kəndini və Kərkini Azərbaycana geri qaytarmalıdır:

"Görünən odur ki, Ermənistan 44 günlük Vətən müharibəsi zamanı darmadağın edilmiş ordusunu yenidən bərpa edərək, silahlandırmaq planları qurub. Heç şübhəsiz ki, Avropa İttifaqının və ABŞ-ın Ermənistana ayırdığı vəsait də bu istiqamətdə istifadə olunacaq. Bu gün bəzi dövlətlər Ermənistanı silahlandıraraq regionda yenidən müharibəni alovlandırmağa, düşünülmüş, məqsədyönlü və planlı şəkildə gərginlik yaratmağa çalışırlar. Azərbaycan nə Ermənistana, nə də havadarlarına regionda vəziyyəti yenidən gərginləşdirməyə icazə verməyəcək. Yaxşı olardı ki, Ermənistan ağlını başəına yığsın və Azərbaycanın şərtləri ilə hazırlanan sülh müqaviləsini imzalasın".

Telegramda izləyin