Azərbaycanda hərbi xidmət müddəti 1 ilə ENDİRİLƏ BİLƏR - AÇIQLAMA

44 günlük Vətən müharibəsi və uğurla keçirilən antiterror əməliyyatlar nəticəsində Qarabağda separatizmə son qoyuldu. O cümlədən Qazaxın kəndləri danışıqlar əsasında geri qaytarılır, delimitasiya və demarkasiya prosesləri həyata keçirilir. Artıq ilkin sülh müqaviləsinin imzalanmasının vaxtı gəlib çatıb. Azərbaycan tərəfi daim ilkin sülh müqaviləsinin imzalanmasına hazırlıqlı olduğunu bildirib.

Əldə edilən nəticələr onu göstərir ki, regionda reallıqlar dəyişib və yumşalma prosesi gedir. Bildiyimiz kimi, Azərbaycanda ali təhsil olmayanlar 1 il 6 ay, universitet bitirən çağırışçıların hərbi xidməti isə 1 ildir. Belə olan halda Azərbaycanda məktəbi bitirib, universitetə daxil olmayan çağırışçıların hərbi xidmətin müddətini 1 ilə endirmək olar?

Mövzu ilə bağlı Sonxeber.az-a danışan hərbi ekspert Emin Həsənli deyib ki, bu məsələyə gələcəkdə baxmaq olar. Belə müzakirələr var ki, yaxın gələcəkdə əsgərlik müddətinin xidməti ali təhsil olmayanlar üçün 1 il, ali təhsili olanlar üçün 6 aya endirilsin:

"Mən də bu fikrə qatılıram. Hesab edirəm ki, bu 1 il ərzində əsgərləri hazırlamaq olar. Bizim ordumuz artıq peşəkar orduya keçir. Xeyli sayda peşəkarlarımız var. Xüsusi Təyinatlı Qüvvələrimiz, gizirlər, müddətdən artıq hərbi qulluqçular, o cümlədən məktəblərimiz müxtəlif istiqamətlərdə fəaliyyət göstərir. Azərbaycan prezidenti cənab İlham Əliyev Ali Baş Komandan kimi qarşıya məqsəd qoyub ki, Ordumuz Türkiyə Silahlı Qüvvələrinin modelinə keçsin. Buna görə də hüquqi baza istismarında xüsusi təkmilləşdirilmələr aparılıb. Hesab edirəm ki, yaxın zamanlarda bu istiqamətlərdə müvafiq addımlar atılacaq".

Ekspertin sözlərinə görə, əsgərlik xidmətinə yola salma 35 yaşdan 27 yaşa endirilə bilər. 4 dəfə yola salma iki dəfə yaz və payız ayları ilə əvəzlənə bilər:

"Bunların hamısı sülh müqaviləsi imzalandıqdan və bölgədə ümumi vəziyyət sabitləşəndən sonra ola bilər. 4 dəfə çağırış ona görə olurdu ki, əsgərliyə çağırılan şəxsi heyətin 75 faizi hazırlıqlı, 25 faiz isə ehtiyata buraxılsın. Biz bunu 2020-ci ilin sentyabr ayında əməliyyatlar zamanı nə qədər önəmli olduğunu gördük. Əgər yay-payız çağırışı olsaydı 50 faiz olacaqdı. Bu da ordunun hazırlığı baxımından problem ola bilərdi. Ancaq müharibə yekunlaşıb və qarşıda sülh müqaviləsi gözlənilir. Sülh müqaviləsindən və bölgədə normallaşdıqdan sonra bu addımlar atıla bilər".

Sevda Səfərova

Telegramda izləyin