"Bu gün hədəfimiz ŞƏT-də müşahidəçi statusu almaqdır" - DEPUTAT

"Cənab prezident İlham Əliyevin Qazaxıstanın paytaxtı Astanada keçirilən Şanxay Əməkdaşlıq Təşkilatının zirvə görüşündə fəxri qonaq kimi iştirakı ölkəmizin artan nüfuzunun göstəricisidir".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, cənab prezident İlham Əliyev artıq ikinci dəfə belə mötəbər təşkilatın Sammitinə ikinci dəfə dəvət olunması ölkəmizin dünya miqyasında nüfuzunun və dövlətimizin başçısına göstərilən yüksək ehtiramın ifadəsidir:

"Bilirsiniz ki, bundan əvvəl cənab prezident İlham Əliyev Şanxay Əməkdaşlıq Təşkilatının 2022-ci ilin sentyabrında Özbəkistanın Səmərqənd şəhərində keçirilmiş Zirvə görüşündə də iştirak etmişdi. Azərbaycanın bu tədbirdə iştirak etməsi bir daha ölkəmizin Şərq ilə Qərb arasında bütün sahələrdə mühüm körpü rolunu oynadığını sübut edir.

Çoxtərəfli dialoqun möhkəmləndirilməsi - davamlı sülhə və inkişafa nail olmaq" mövzusuna həsr olunan Zirvə görüşündə ŞƏT-ə üzv ölkələrin dövlət və hökumət başçıları siyasi, iqtisadi-ticari, mədəni-humanitar əməkdaşlıq və digər məsələlərə dair geniş spektrdə aktual mövzuları müzakirə edilir. Zirvə görüşündə əsas siyasi sənəd olan Astana Bəyannaməsi ŞƏT-in bir çox aktual məsələlərlə bağlı mövqeyini ortaya qoyacaq, təşkilatın fəaliyyətini qiymətləndirəcək və gələcək üçün istiqamətləri müəyyənləşdirəcək".

Deputat vurğulayıb ki, cənab prezident İlham Əliyev Astanaya səfəri çərçivəsində Çin, Rusiya, Türkiyə, Pakistan və Qazaxıstan dövlət başçıları ilə ikitərəfli görüşlər keçirib:

"Görüş zamanı ölkələr arasında münasibətlərin inkişaf etdirilməsinə dair fikir mübadiləsi aparılıb. Bu gün hədəfimiz ŞƏT-də müşahidəçi statusu almaqdır. Ölkəmizin ŞƏT-də müşahidəçi statusu alması bu nüfuzlu qurum üçün də böyük önəm daşıyır. Çünki cənab prezident İlham Əliyevin uzaqgörən siyasəti nəticəsində ölkəmiz sürətlə inkişaf edərək regionda ən nüfuzlu dövlətə çevrilib. Azərbaycan gənc müstəqil dövlət olsa da mötəbər beynəlxalq qurumlara uğurla rəhbərlik edən ölkə kimi qlobal səviyyəli məsələlərin müzakirə olunduğu mühüm platformaya çevrilib. Ən önəmlisi ölkəmizin bu il COP29 kimi mötəbər beynəlxalq tədbirə ev sahibliyi etməsi cənab prezident İlham Əliyevin dünyada böyük hörmətə və nüfuza sahibi olduğunun sübutudur".

Telegramda izləyin